Dagslokagengi íslenska málmleitarfélagsins Amaroq var 164 krónur eftir tæplega 6% hækkun í 729 milljóna króna viðskiptum í dag.
Dagslokagengi félagsins hefur aldrei verið hærra en gengi félagsins hefur hækkað um 13,5% síðastliðinn mánuð og um tæp 37% á árinu.
Um miðjan nóvembermánuð greindi Amaroq frá því að félagið hefði gert sölusamning við Auramet International en í samningnum skuldbindur Auramet sig til að kaupa allt gull sem félagið framleiðir í Nalunaq-gullnámunni í Suður-Grænlandi.
Samhliða því var tilkynnt að Amaroq hefði náð samningum við Metalor Technologies SA, um að fullvinna gullstangir félagsins en Metalor sérhæfir sig í mati og vinnslu góðmálma í vinnslustöð sinni sem staðsett er í Zurich, Sviss.
Tæplega tveimur vikum síðar steypti félagið sinn fyrsta gullmola en Amaroq framleiddi um 1,2 kílógramm af gulli (39 troy-únsur) úr Nalunaq-námunni.
Félagið stefnir á að auka framleiðslu upp í stöðug, full afköst á 4. ársfjórðungi 2025, þar sem unnin verða 260-300 tonn á dag af efni með áætluðum 12-16 g/t af gullstyrkleika.
Hlutabréfaverð Símans hækkaði um 2,5% í 513 milljón króna viðskiptum í dag.
Dagslokagengi Símans var 13,75 krónur á hlut en gengi félagsins hefur nú hækkað um 41% á árinu.
Gengi Festi dalaði örlítið í viðskiptum dagsins og lækkaði um 2% í 619 milljón króna veltu en gengi félagsins hefur verið á miklu skriði síðustu mánuði.
Dagslokagengi Festi var 282 krónur sem er tæplega 40% hærra en í ársbyrjun.
Úrvalsvísitalan OMXI15 hækkaði um 0,34% og var heildarvelta á markaði 5,2 milljarðar.
