Hlutabréfaverð Amaroq Minerals hækkaði um tæp 14% í viðskiptum dagsins og hefur gengi málmleitarfélagsins nú hækkað um 33% frá því að Trump frestaði tollum í síðustu viku.
Amaoq, líkt og vaxtarfélögin Oculis og Alvotech, lækkuðu gríðarlega eftir að Trump greindi frá tollaáformum sínum í byrjun mánaðar.
Hlutabréfaverð Amaroq stóð í 115,5 krónum á hlut eftir lokun markaða á miðvikudaginn í síðustu viku en dagslokagengið var 154 krónur í dag.
Gengi Oculis, sem hækkaði örlítið í viðskiptum dagsins, hefur einnig tekið við sér á síðustu viðskiptadögum og hækkað um 23% frá því að Trump frestaði tollum.
Hlutabréfaverð Alvotech hefur einnig hækkað síðastliðna viku en ekki af sama viti og gengi hinna tveggja.
Gengi Alvotech lækkaði um tæp 2% í viðskiptum dagsins og lokaði í 1.085 krónum. Gengið stóð í 1.000 krónum á hlut þegar Trump ákvað að fresta tollum sínum.
Hlutabréfaverð Haga hækkaði um tæp 4% í hálfs milljarðs króna viðskiptum en félagið birti stjórnendauppgjör eftir lokun markaða í gær.
Samkvæmt stjórnendauppgjöri Haga nam vörusala samstæðunnar 180,3 milljörðum króna á árinu og jókst um 4,1% frá fyrra ári.
Framlegðin hækkaði í 22,8% og nam 41,1 milljarði króna. EBITDA-hagnaður ársins nam 14,7 milljörðum króna, sem er 8,2% af veltu, og hagnaður eftir skatta nam 7,0 milljörðum króna, sem jafngildir 3,9% af veltu.
Úrvalsvísitalan OMXI15 hækkaði um 0,36% og lokaði í 2.473,23 stigum. Heildarvelta á markaði nam 1,9 milljörðum króna.
