Hlutabréfaverð málmleitarfélagsins hefur lækkað um rúm 13% í vikunni en félagið birti árshlutauppgjör fyrir opnun markaða í gær.
Hlutabréf í félaginu lækkuðu örlítið í aðdraganda uppgjörs en gengið fór síðan niður um 4% í viðskiptum gærdagsins.
Dagslokagengið var 138 krónur á hlut en þegar þetta er skrifað stendur gengið í 130 krónum eftir um 6% lækkun í viðskiptum dagsins.
Samkvæmt árshlutauppgjöri málmleitarfélagsins Amaroq Minerals vinnur félagið hörðum höndum að frekari uppbyggingu í Nalunaq-gullnámunni í Suður-Grænlandi. Stöðugur framgangur er á verkefninu þrátt fyrir árstíðabundnar áskoranir.
„Eins og fram kom í kynningu okkar á ársuppgjöri 2024 leiddu veðurtengdar aðstæður á fyrsta ársfjórðungi til þess að það hægðist á framkvæmdum við vinnslustöð okkar í Nalunaq. Ég er aftur á móti afar ánægður með þróunina undanfarið og höfum við sýnt góðan framgang í vinnslustöðinni en ekki síður í námuvinnslunni,“ sagði Eldur Ólafsson, forstjóri Amaroq Minerals, í uppgjörinu.
Rekstrartap tímabilsins nam 4,4 milljónum kanadadollara, sem er veruleg lækkun frá sama tímabili í fyrra (9,2 milljónir). Samhliða náði félagið í tekjur að fjárhæð 643 þúsund dali vegna stjórnunarverkefna tengdum Gardaq-samstarfsverkefninu.
Lausafjárstaða félagsins var sterk í lok fjórðungsins, með 23,4 milljónir dala í lausafé, þar af 16,7 milljónir í reiðufé og aðgang að ónotaðri 23,7 milljóna dala lánalínu, að frádregnum 17 milljónum í viðskiptaskuldir.
Áframhaldandi framkvæmdir við vinnslustöð og gangsetningu fyrsta fasa eru á áætlun.
Fyrirtækið miðar að því að ná framleiðslugetu upp á 300 tonn á dag á fjórða ársfjórðungi. Vegna eðlis gangsetningar og tilraunavinnslu er árleg framleiðsluspá sett í bilinu 5 til 20 þúsund únsur gulls.
