Hlutabréfaverð Eimskips hækkaði um 6% í 539 milljón króna viðskiptum í dag og var daglokagengi gámaflutningafélagsins 418 krónur.
Dagslokagengið var síðast svo hátt í febrúar 2024 en töluverðar áskoranir hafa verið í gámaflutningum síðastliðið ár.
Eimskip byrjaði fyrsta fjórðung í fyrra á að færa afkomuspá sína niður eftir snarpa lækkun á flutningsverðum.
Hlutabréfaverð Eimskips féll niður í 312 krónur um miðjan maí í fyrra en gengið hefur hækkað um 34% síðan þá.
Gengi Eimskips byrjaði að taka við sér að nýju eftir árshlutauppgjör í nóvember en afkoma félagsins á þriðja ársfjórðungi var sú sterkasta á árinu.
Tekjur félagsins jukust um 18,6 milljónir evra frá fyrra ári og námu 220,6 milljónum evra á fjórðungnum, sem samsvarar um 33 milljörðum króna á gengi dagsins.
Hagnaður eftir skatta nam 14,3 milljónum evra samanborið við 16,6 milljónir evra fyrir sama tímabil árið 2023.
Gengi Eimskips fór upp í 400 krónur eftir uppgjörið en hefur verið á bilinu 380 til 390 krónur síðan þá.
Hlutabréfaverð Iceland Seafood International hækkaði fimmta viðskiptadaginn í röð og var dagslokagengi félagsins 5,3 krónur eftir 3% hækkun í viðskiptum dagsins.
Þá fór gengi Icelandair og Play hvort í sína áttina er gengi Icelandair lækkaði um rúm 3% í 170 milljón króna veltu á meðan gengi Play hækkaði um rúm 2% í örviðskiptum.
Úrvalsvísitalan OMXI 15 hækkaði um 0,21% og var heildarvelta á markaði 5,7 milljarðar.
