Hlutabréfaverð fasteignafélaganna Kaldalóns, Eikar, Reita og Heima hækkaði um 3-4% í yfir milljarða viðskiptum í dag.
Kaldalón, sem fluttist yfir á Aðalmarkaðinn í nóvember í fyrra, leiddi hækkanir í viðskiptum dagsins er gengi félagsins hækkaði um 4% í 246 milljón króna viðskiptum.
Dagslokagengið var 16,85 krónur en fyrir skömmu óskaði fasteignafélagið eftir því við hluthafa að flýta kaupum á eigin bréfum vegna þess að markaðsvirði félagsins, að mati stjórnar, væri ekki í samræmi við virði undirliggjandi eigna.
Úr vaxtarfélagi í arðgreiðslufélag
Jón Þór Gunnarsson, forstjóri Kaldalóns, keypti 330 þúsund hluti í félaginu við opnun markaða en gengið í viðskiptunum var 16,35 og kaupverðið því um 5,4 milljónir.
Hlutabréf Kaldalóns voru tekin til viðskipta á aðalmarkaði Kauphallarinnar síðastliðið haust eftir um fjögur ár á First North markaðinum.
Í samtali við Viðskiptablaðið í nóvember í fyrra sagði Jón Þór að félagið væri enn vaxtarfélag en nú í vor yrði ákveðið hvenær Kaldalón myndi skilgreina sig sem arðgreiðslufélag, með reglulegum arðgreiðslum eða endurkaupaáætlunum.
„Félagið er mjög vel fjármagnað og með skuldahlutfall talsvert undir samanburðarfélögum. Við getum enn þá vaxið með innri vexti en samt haldið þeim viðmiðum í skuldahlutfalli sem félagið hefur sett,“ sagði Jón Þór.
Sveiflur á gengi Eikar
Hlutabréfaverð Eikar hefur sveiflast verulega síðastliðinn mánuð en dagslokagengið fór til að mynda úr 9,45 krónum í byrjun maí yfir í 10,6 krónur þann 23. maí sem samsvarar um 12% hækkun.
Degi síðar var gerður hátt í tveggja milljarða skiptasamningur (e. swap) á hlutabréfum Eikar og bréfum annarra skráðra félaga í Kauphöllinni. Um utanþingsviðskipti er að ræða sem tilkynnt voru við opnun markaða og féll gengi Eikar um 5% þann 24. maí.
Gengi Eikar hefur síðan þá hækkað um tæp 9% síðan en gengið fór upp um 4% í viðskiptum dagsins.
Hlutabréfaverð Reita hækkaði um rúm 3% í yfir hálfs milljarðs viðskiptum í dag en fasteignafélagið greindi frá 3,4 milljarða fasteignakaupum eftir lokun markaða í gær.
Samkvæmt Kauphallartilkynningu áætlar fasteignafélagið að rekstrarhagnaður hækki um 230 milljónir á ársgrundvelli eftir kaupin.
Reitir keyptu tvær fasteignir með langtímaleigusamningum á höfuðborgarsvæðinu fyrir rúmlega 2,2 milljarða samhliða því að félagið gekk frá kaupum á ÞEJ fasteignum ehf. á rúmlega 1,5 milljarða.
Hlutabréfaverð Heima hækkaði síðan um 3% í viðskiptum dagsins en gengi félagsins hefur hækkað um 8% síðastliðinn mánuð.
Rúmur mánuður er síðan Heimar, áður Reginn, dró yfirtökutilboð sitt í Eik til baka en Halldór Benjamín Þorbergsson, forstjóri Heima, sagði í kjölfarið í tilkynningu að félagið myndi fara aðrar leiðir að sama marki.
Hann lofaði því að Heimar myndu vinna hratt í að byggja upp langtímastefnu félagsins sem myndi fela í sér að selja eignir og endurfjárfesta í fasteignum innan skilgreindra kjarna, einkum í nýbyggingum.
„Þessi samruni er síður en svo eina sóknarfærið sem við höfum augastað á. Markmið okkar er að byggja upp til langs tíma og halda áfram að styrkja kjarnasvæði Regins sem eiga inni mikil vaxtatækifæri. Það er ljóst að búið er að hrista upp í markaðnum og það eru áhugaverðir tímar fram undan,“ sagði Halldór Benjamín í lok apríl.