Hlutabréfaverð Play lækkaði um rúm 28% í viðskiptum dagsins og hefur gengi flugfélagsins nú lækkað um rúm 81% frá ársbyrjun 2024.
Eftir lokun markaða í gær greindi Play frá grundvallarbreytingum á viðskiptalíkani flugfélagsins en félagið hyggst stórefla þjónustu til sólarlandaáfangastaða frá Íslandi en draga töluvert úr umsvifum tengiflugs á milli Norður-Ameríku og Evrópu.
Þá greindi Play frá því að til stæði að sækja um flugrekstrarleyfi á Möltu.
Samhliða þessu tilkynnti félagið um að uppfærð afkomuáætlun gæfi vísbendingar um að rekstrarafkoma félagsins verði verri en á síðasta ári, ólíkt því sem spáð hafði verið fyrir um. Félagið telur þó ekki þörf á auknu fjármagni til rekstrarins á næstunni.
Einungis 12 milljón króna velta var með bréf Play í dag og urðu stærstu einstöku viðskiptin skömmu eftir opnun markaða með milljón hluti á genginu 1,6 krónur.
Dagslokagengi Play var 1,38 krónur og hefur aldrei verið lægra.
Hlutabréfaverð Haga leiddi hækkanir á aðalmarkaði er gengi félagsins fór upp um tæp 2% í 147 milljón króna viðskiptum.
Hlutabréf málmleitarfélagsins Amaroq hækkaði um tæpt 1,5% í 71 milljón króna viðskiptum en heimsmarkaðsverð á gulli fór aftur í sögulega hæð í dag.
Únsan af gulli stendur í 2627,3 dölum þegar þetta er skrifað en Eldur Ólafsson, stofnandi og forstjóri málmleitarfélagsins, hefur gefið það út að til standi að hefja gullframleiðslu fyrir árslok.
Úrvalsvísitalan OMXI15 fór niður um 0,02% í viðskiptum dagsins og var heildarvelta á markaði 4,1 milljarður.