Valfrjálst yfirtökutilboð John Bean Technologies í allt hlutafé Marels var auglýst opinberlega í Morgunblaðinu í morgun.
Samkvæmt auglýsingunni hefst tilboðið þann 24. júní 2024 og rennur út kl. 17:00 að íslenskum tíma þann 2. september en hægt er að framlengja slíka dagsetningu á hverjum tíma samkvæmt viðskiptasamningi sem tilboðsgjafi, JBT og Marel gerðu með sér í apríl.
Valfrjálst yfirtökutilboð John Bean Technologies í allt hlutafé Marels var auglýst opinberlega í Morgunblaðinu í morgun.
Samkvæmt auglýsingunni hefst tilboðið þann 24. júní 2024 og rennur út kl. 17:00 að íslenskum tíma þann 2. september en hægt er að framlengja slíka dagsetningu á hverjum tíma samkvæmt viðskiptasamningi sem tilboðsgjafi, JBT og Marel gerðu með sér í apríl.
Líkt og áður hefur komið fram bjóðast hluthöfum 3,60 evrur á hvern hlut. Hluthafar geta valið milli þess að fá:
- Að fá greiddar 3,60 evrur í reiðufé.
- Að fá afhenta 0,0265 hluti í JBT og 1,26 evrur í reiðufé.
- Fá afhenta 0,0407 hluti í JBT.
Miðað er við viðmiðunargengi á hvern hlut í JBT upp á 96,25 Bandaríkjadali og er fast skiptigengi evru og krónu 149,5.
Rétt er að taka fram að aðeins 950 milljónir evra skiptast á milli allra þeirra hluthafa sem óska eftir því að fá reiðufé.
Eftir að því hefur verið skipt niður pro rata á þá hluthafa sem eftir því óska, verður toppað upp með hlutabréfum í JBT.
Vegið meðaltal full endurgjalds JBT fyrir allt hlutafé í Marel verður því samsett af 35% í formi reiðufjár og 65% í formi afhentra hlutabréfa í JBT.
Gengi JBT á uppleið
Samkvæmt útreikningum Viðskiptablaðsins, miðað við núverandi gengi JBT í Kauphöllinni í New York, fá hluthafar hæstu krónutölu fyrir sinn hlut með því að óska eftir hlutum í hinu sameinaða félagi.
Núverandi gengi Marel í Kauphöllinni er 506 krónur á hlut og núverandi gengi JBT er 100,5 dalir á hlut. Gengi JBT hefur hækkað um 8% síðastliðinn mánuð.
Á fasta skiptigenginu fá hluthafar 538 krónur fyrir hvern hlut með því að velja fyrsta valmöguleikann.
Með því að reikna með núverandi hlutabréfaverði JBT fá hluthafar 554 krónur fyrir hlut með því að velja valmöguleikann tvo en um 561 krónur á hlut með því að taka við hlutum í sameinaða félaginu (að því gefnu að gengið haldist óbreytt).
Í tilboðsauglýsingunni segir að samþykkir hluthafar geti valið að fá JBT-tilboðsbréfin skráð annaðhvort í (i) NYSE eða (ii) Nasdaq Iceland (háð samþykki á tvískráningu) og ef ekkert sérstakt er valið, skulu samþykkir hluthafar fá JBT-tilboðsbréfin skráð í NYSE.
„Samþykkir hluthafar sem velja að fá greiðslur eins og lýst er í (i) að ofan munu eingöngu fá JBT-tilboðsbréfin ef hlutföllunarferlið sem lýst er í tilboðsyfirlitinu og lýsingunni leiðir til þess að slíkir samþykkir hluthafar fái sambland af reiðufé og JBT-tilboðsbréfum. Val mun verða háð hlutföllunarferlinu, eins og við á, eins og lýst er í tilboðsyfirlitinu og lýsingunni, þannig að hluthafar munu fá við uppgjör tilboðsins (að því gefnu að 100% hluthafa samþykki tilboðið) samanlagða fjárhæð sem nemur um það bil 950 milljónum evra í reiðufé og um það bil 38% eignarhlut í sameinuðu félagi,” segir í tilkynningunni.