Hluthöfum Nova fækkað um þriðjung

Fleiri en 1.600 fjárfestar hafa selt sig út úr Nova frá því að fjarskiptafélagið var skráð í Kauphöllina í júní. Í svari við fyrirspurn Viðskiptablaðsins segir að hluthafar Nova hafi verið um 3.400 talsins í lok október. Hluthöfum Nova hefur fækkað um þriðjung á rúmu hálfu ári.

Að loknu 8,7 milljarða króna frumútboði Nova í júní síðastliðnum voru hluthafar fjarskiptafélagsins yfir fimm þúsund talsins. Af rúmlega 5 þúsund áskriftum í útboðinu voru um 1.500 frá viðskiptavinum.

Lækkun hlutabréfaverð Nova frá skráningu gæti hafa hreyft við einhverjum hluthöfum. Gengi Nova endaði daginn í 3,92 krónum á hlut og hefur aldrei verið lægra. Hlutabréf félagsins eru nú 23% undir 5,11 krónu útboðsgenginu.

Enn með einn fjölmennasta hluthafahópinn

Þrátt fyrir lækkun hlutabréfaverðsins og að Nova sé minnsta félagið á aðalmarkaði Kauphallarinnar, sé litið til markaðsvirðis, þá er fjarskiptafélagið enn með einn fjölmennasta hluthafahópinn.

Miðað við síðustu útgefnar upplýsingar um fjölda hluthafa hjá öllum 22 félögum aðalmarkaðarins er Nova með sjöunda fjölmennasta hluthafahópinn.

Til samanburðar voru hluthafar Símans 1.242 talsins í lok september. Þá var Sýn með 326 hluthafa í lok síðasta árs. Hafi þeim ekki fjölgað töluvert í ár má ætla að Sýn sé með fámennasta hluthafahóp aðalmarkaðarins.