Matreiðslukonan Hrefna Rósa Sætran hefur sagt skilið við meðeigendur sína og selt hlut sinn í Grillmarkaðnum, Trattoria og Rauttvín. Þetta kemur fram í færslu á Facebook-síðu Hrefnu.
Þar segir að hún muni einblína áfram á rekstur Fiskmarkaðsins, Uppi bar, Skúla Craft Bar og Kampavínsfjélagsins.
„Það er gott að breyta til og einfalda lífið. Ég finn sterkt að mín ástríða liggur í að skapa framúrskarandi upplifun í mat og drykk og bjóða upp á gæðavörur þegar fólk heimsækir okkur. Þessi hugsun endurspeglast í öllu sem við gerum, hvort sem það er á veitingastaðnum, á barnum, í víninu eða á miðlunum okkar,“ segir í færslu.
Hrefna naut mikillar velgengni í veitingarekstri en árið 2012 skilaði Fiskimarkaðurinn 34,8 milljóna króna hagnaði og hagnaðist Grillmarkaðurinn, sem Hrefna stofnaði árið 2011, um 32,6 milljónir króna.
„Þetta eru spennandi tímamót og ég spennt að halda áfram þeirri skemmtilegu vinnu sem við höfum verið í síðustu ár með öllu því skapandi fólki sem ég fæ að vinna með. Svo eru fram undan ótrúlega spennandi verkefni í gangi hjá okkur sem ég hlakka til að segja ykkur frá. Nú er rétti tíminn til að setja mína krafta í það sem ég brenn fyrir. Búa til upplifanir og góðar stundir. Það er það sem gerir þetta skemmtilegt.“
