HSBC, stærsti banki Evrópu, hefur ákveðið að loka lykilhlutum fjárfestingarbankastarfsemi sinnar í Bretlandi, Evrópu og Ameríku.
Aðgerðin er hluti af endurskipulagningu sem Georges Elhedery forstjóri bankans stendur fyrir samkvæmt Financial Times.
Samkvæmt minnisblaði sem bankinn sendi frá sér í dag mun HSBC hætta viðskiptaráðgjöf sinni á sviði samruna og yfirtaka (M&A) og starfsemi á hlutabréfamörkuðum utan Asíu og Miðausturlanda.
„Þessar einingar hafa í raun ekki nægilega umfangsmikla starfsemi,“ sagði heimildarmaður sem þekkir til málsins við FT. „Það var einfaldlega mjög erfitt að byggja upp stöðu þar sem HSBC hefur nægilegt samkeppnisforskot.“
Þrátt fyrir þessar breytingar mun bankinn áfram viðhalda starfsemi sinni í skuldabréfaútgáfum, fjármögnun skuldsettra yfirtaka, raunverulegri eignafjármögnun og innviðafjármögnun á þessum mörkuðum, að sögn heimildarmannsins.
Aðgerðin, sem fyrst var greint frá hjá Bloomberg, kemur á sama tíma og Elhedery vinnur að víðtækri endurskipulagningu þar sem bankanum er skipt upp í „austur“ og „vestur“ einingar.
Fjárfestingabankastarfsemi HSBC nam einungis um 6 prósentum af heildartekjum bankans á fyrri hluta síðasta árs samkvæmt árshlutauppgjöri.
Tekjur starfseminnar lækkuðu um 3 prósent á milli ára á sama tímabili.
