Hver eru bestu við­skiptin í við­skipta­stríði?

Viðskiptastríð Donalds Trump hefur sett mark sitt á fjármálamarkaði um allan heim og valdið miklum sveiflum, samkvæmt Financial Times.

Tilkynningar um nýja tolla á helstu viðskiptalönd Bandaríkjanna hafa skapað óvissu á mörkuðum og eru fjárfestar að bregðast við og reyna að verja eignir sínar gegn frekari lækkunum.

Þrátt fyrir undirbúning af ýmsu tagi hafa óvæntar vendingar og snögg viðbrögð markaða gert stöðuna erfiða.

Hlutabréfamarkaðurinn: Hvergi er hægt að forðast áhættu

Bandarískir fjárfestingarbankar hafa síðustu misseri sett saman svokallaðar „tollakörfur“ en um er að ræða safn hlutabréfa sem eru viðkvæm fyrir áhrifum tolla.

Í þeim eru meðal annars hlutabréf bandarískra bílaframleiðenda á borð við General Motors og Ford, auk evrópskra fyrirtækja eins og Volkswagen og BMW.

Þegar tollafréttir bárust féllu þessi bréf snarlega á mánudag en tóku við sér aftur eftir að innleiðingu tollanna var frestað.

UBS Trump Tariff Losers-karafan, sem fylgist með fyrirtækjum sem verða fyrir neikvæðum áhrifum af tollum, lækkaði um 6,6% á tveimur dögum, föstudag og mánudag, og tapaði þar með allri ávöxtun sinni það sem af er ári.

Þekktir fjárfestingarsjóðir eins og Marshall Wace og AKO Capital hafa jafnframt veðjað gegn evrópskum bílaframleiðendum.

Marshall Wace er með skortstöður í BMW og Mercedes-Benz, á meðan AKO Capital er að skortselja bréf Daimler Truck.

Þrátt fyrir þessar varkáru nálganir eru margir fjárfestar hikandi við að fara of langt í neikvæðum væntingum.

Drew Pettit, sérfræðingur hjá Citi, mælir með því að fjárfestar haldi jafnvægi með því að fjárfesta í fjölbreyttum eignum: vaxtarbréfum, hagsveiflubundnum bréfum og varnarbréfum.

Gjaldmiðlar: Sveiflur og óvissa

Gjaldmiðlamarkaðurinn hefur ekki farið varhluta af áhrifum tollanna. Kanadadollarinn féll á mánudag í sitt lægsta gildi gagnvart Bandaríkjadal síðan árið 2003, þar sem fjárfestar gerðu ráð fyrir að kanadíski seðlabankinn myndi lækka vexti hraðar en áður var gert ráð fyrir. Samkvæmt CME Group var metfjöldi 386.000 skráðra framtíðarsamninga tengdur kanadadal á mánudag.

Mexíkóskur pesó varð fyrir svipuðum áhrifum og féll verulega, en báðir gjaldmiðlarnir tóku við sér á ný þegar tilkynnt var um tafir á innleiðingu tollanna. Þetta hefur valdið mikilli óvissu meðal gjaldmiðlaviðskiptaaðila, sem eiga í erfiðleikum með að greina hvort Trump hafi heildstæða áætlun eða sé að bregðast við í skrefum frá degi til dags.

Skuldabréf: Tvíþætt áhrif

Á skuldabréfamarkaði hafa fjárfestar verið að glíma við að mat um hvort tollar valdi aukinni verðbólgu eða dragi úr hagvexti.

Á mánudag voru tvöföld skilaboð frá markaði: Þó að tveggja ára bandarísk ríkisskuldabréf hafi fyrst hækkað vegna væntinga um verðbólgu þá lækkuðu þau aftur í kjölfarið þegar markaðurinn gerði ráð fyrir hægari vaxtalækkunum í Bandaríkjunum.

„Þú hefur mótsagnakennd áhrif,“ útskýrði Mark Cabana, yfirmaður vaxtastefnu í Bandaríkjunum hjá Bank of America. „Markaðurinn gerir ráð fyrir að Seðlabankinn haldi vöxtum lengur í skefjum vegna verðbólgu, en á sama tíma eykjast líkurnar á vaxtalækkunum síðar vegna hægari hagvaxtar.“

Sumir fjárfestar hafa gripið tækifærið til að kaupa verðtryggð ríkisskuldabréf, sem veita bæði vernd gegn verðbólgu og hægari hagvexti.

Gull og önnur örugg skjól

Í miðri óvissu hefur gull slegið nýtt verðmet og náði 2.882 Bandaríkjadölum á únsu í vikunni, sem undirstrikar aukna eftirspurn eftir öruggum eignum.

Aðrar eignir, eins og bitcoin, sem stundum er kallað „stafrænt gull“, hafa þó ekki náð að veita sömu vernd, þar sem bitcoin lækkaði þrátt fyrir væntingar um að tollastefna Trumps myndi styðja við stafrænar eignir.

Fjárfestar halda áfram að glíma við óvissuna. „Það er erfitt að taka stóra ákvörðun um að minnka áhættu í núverandi umhverfi,“ sagði Andrew Pease, aðalhagfræðingur hjá Russell Investments. „Ef markaðurinn leiðréttir sig ekki, er erfitt að komast aftur í jafnvægi.“