Afkomuspá Icelandair fyrir árið 2024 gerir ráð auknum hagnaði á milli ára og að EBIT hlutfall verði 2-4%, samkvæmt kauphallartilkynningu.
Icelandair hagnaðist um 1,5 milljarða króna eftir skatta á árinu 2023, samanborið við 800 milljóna króna tap árið áður. Var það í fyrsta sinn frá árinu 2017 sem Icelandair skilaði hagnaði eftir skatta á ársgrundvelli.
Afkomuspá Icelandair fyrir árið 2024 gerir ráð auknum hagnaði á milli ára og að EBIT hlutfall verði 2-4%, samkvæmt kauphallartilkynningu.
Icelandair hagnaðist um 1,5 milljarða króna eftir skatta á árinu 2023, samanborið við 800 milljóna króna tap árið áður. Var það í fyrsta sinn frá árinu 2017 sem Icelandair skilaði hagnaði eftir skatta á ársgrundvelli.
„Óvissa í rekstrarumhverfinu, sem fjallað var um í tilkynningu með uppgjöri ársins 2023 hinn 1. febrúar síðastliðinn, hefur minnkað. Bæði hafa áhrif af ónákvæmum fréttum af eldsumbrotum á Reykjanesi á bókanir minnkað ásamt því að nýgerðir langtíma kjarasamningar á almennum vinnumarkaði skapa meiri stöðugleika,“ segir í afkomuspánni.
Flugfélagið gerir jafnframt ráð fyrir að flugframboð, í sætiskílómetrum, aukist um 10% frá fyrra ári.
„Áherslan verður á að auka framboð inn á markaði sem hafa mikla tekju- og arðsemismöguleika. Vöxturinn var mestur á fyrsta ársfjórðungi eða um 21%. Gert er ráð fyrir um 9% vexti á öðrum og þriðja ársfjórðungi og 6% á fjórða ársfjórðungi.“
Miðað við afkomu fyrstu tveggja mánaða ársins, núverandi bókunarstöðu og aðrar lykilforsendur gerir flugfélagið ráð fyrir að heildartekjur verði um 220 milljarðar króna (1,6 milljarðar dala) á árinu 2024. Flugfélagið gerir ráð fyrir að EBIT hlutfall verði um 2-4% af tekjum og að hagnaður eftir skatta aukist milli ára.
„Alþjóðleg fjölmiðlaumfjöllun um jarðhræringarnar á Reykjanesi hafði áhrif á tekjur í fyrsta ársfjórðungi sem og mikil framboðsaukning á ákveðnum mörkuðum, eins og Bretlandi, Frankfurt og Amsterdam sem hafði áhrif á einingatekjur. Því er gert ráð fyrir að EBIT afkoma á fyrsta ársfjórðungi 2024 verði aðeins lakari en 2023.“
Samkvæmt Icelandair er eftirspurn frá Íslandi áfram sterk og bókunarstaðan fyrir sumarið, sérstaklega á Atlantshafsmarkaðnum um Ísland, er góð.
„Þá vekja nýgerðir kjarasamningar vonir um aukinn efnahagslegan stöðugleika sem styrkir samkeppnishæfni landsins sem er mikilvægt að viðhalda til þess að ferðaþjónustan haldi áfram að blómstra. Því eru framtíðarhorfur Íslands sem ferðamannalands áfram góðar. Árið 2023 lauk endurreisninni hjá Icelandair eftir heimsfaraldurinn og reksturinn skilaði hagnaði á ný. Nú er áherslan fyrst og fremst á aðgerðir til að styrkja tekjumyndun enn frekar og ná fram aukinni skilvirkni í rekstrinum. Með þessar áherslur að leiðarljósi er Icelandair á réttri leið að ná langtímamarkmiði sínu um 8% rekstrarhagnað (EBIT) að meðaltali.”
