EBIT- afkoma Icelandair á öðrum ársfjórðungi nam 3,3 milljónum dala eða um 457 milljónum króna og var hagnaður eftir skatta 86 milljónir króna.
Um er að ræða töluvert betri afkomu milli fjórðunga en Icelandair tapaði yfir 8 milljörðum króna eftir skatta á fyrsta fjórðungi á sama tíma og heildartekjur félagsins höfðu aldrei verið meiri.
Afkoman er þó töluvert verri í samanburði við annan ársfjórðung í fyrra er flugfélagið hagnaðist um 14,7 milljónir dala eða tvo milljarða króna.
Í árshlutauppgjöri fyrir annan ársfjórðung 2024 kemur fram að félagið áætlar að hagræðingaraðgerðir í maí og júní muni skila um 1,4 milljarða króna, 10 milljóna dala, sparnaði á ársgrundvelli.
Um 8% framboðsaukning var félaginu á fjórðungnum en flotaendurnýjun, kostnaðaraðhald og aukin skilvirkni í rekstri höfðu áhrif til lækkunar á einingakostnaði.
Jákvæður viðsnúningur var í fraktstarfsemi félagsins sem nam 482 milljónum króna eða um 3,4 milljónum dala.
„Flugreksturinn gengur vel, stundvísi hefur verið framúrskarandi fimm mánuði í röð og vorum við útnefnd stundvísasta flugfélag í Evrópu í júní. Það er mjög ánægjulegt að sjá að áhersla á aukna skilvirkni í rekstrinum er þegar farin að skila sér og endurspeglast í lækkun einingakostnaðar á öðrum ársfjórðungi, þrátt fyrir háa verðbólgu og kostnaðarhækkanir. Við höfum jafnframt náð góðum árangri í að bæta afkomu af fraktstarfseminni og leiguflugstarfsemi okkar heldur áfram að ganga vel sem og innanlandsflugið. Þessi árangur er að þakka samhentu átaki starfsfólks á öllum sviðum félagsins,” segir Bogi Nils Bogason, forstjóri Icelandair, í uppgjörinu.
Lausafjárstaða flugfélagsins er sterk og nam 64,8 milljörðum króna í lok fjórðungsins. Lausafjárstaða félagsins er næstum tvöfalt meiri en markaðsvirði félagsins sem nam 36 milljörðum við lok markaðar í dag.
„Eftirspurn á ferðamannamarkaðnum til Íslands er ekki eins sterk og á síðasta ári en okkur hefur gengið mjög vel að nýta sveigjanleika leiðakerfisins og halda sætanýtingu á ásættanlegum stað með því að setja meiri áherslu á markaðinn yfir Atlantshafið. Breytt samsetning farþega hafði hins vegar áhrif á meðalfargjöld og þar með einingatekjur á öðrum ársfjórðungi. Eftir mikið uppbyggingartímabil eftir Covid sem lauk á síðasta ári hefur áhersla okkar á þessu ári verið á aðgerðir til að ná fram aukinni skilvirkni í rekstrinum. Fjölmörg hagræðingarverkefni eru í vinnslu sem sum hver hafa þegar skilað árangri og gerum við ráð fyrir að sjá enn frekari árangur til lengri tíma. Við höldum jafnframt áfram að styrkja tekjumyndun hjá okkur og nýtum fjölbreytta tekjustrauma til þess. Við höfum meðal annars styrkt tekjugrunn félagsins með samstarfssamningum við tvö flugfélög á árinu – Emirates og TAP í Portúgal – en tekjur í gegnum slíkt samstarf nema í dag ríflega 10% af heildartekjum félagsins,” segir Bogi í uppgjörinu.
Bogi segir félagið sjá mikil tækifæri á næstu misserum og nefnir þar stækkun leiðakerfisins með nýjum, langdrægari flugvélum sem verða grunnurinn að áframhaldandi þróun Íslands sem ferðamannalands og tengimiðstöðvar milli Evrópu og Norður-Ameríku.
„Þrátt fyrir tímabundnar sveiflur á milli ára hef ég fulla trú á tækifærum Íslands sem áfangastaðar og ekki síður því tengimódeli sem við höfum byggt hér upp síðustu áratugi. Markaðurinn til Íslands er þegar farinn að sýna jákvæð merki og við teljum að hann muni jafna sig á næstu misserum ef haldið er rétt á spilunum. Rekstraráherslur okkar munu gera okkur samkeppnishæfari, afkastameiri og skilvirkari, sem til viðbótar verður samkeppnishæfari, afkastameiri og skilvirkari, sem til viðbótar við mjög sterka lausafjárstöðu gerir okkur vel í stakk búin til að takast á við þau verkefni sem fram undan eru og ná árangri til framtíðar.“
