Stjórnir VÍS, Fossa fjárfestingabanka, SIV eignastýringar, Íslenskra verðbréfa (ÍV) og ÍV-sjóða hafa samþykkt tilhögun á fyrirhugaðri samþættingu ÍV og ÍV-sjóða inn í samstæðu Skaga.
Samkvæmt tilkynningu til kauphallarinnar er fyrirhugað að samþætta starfsemi ÍV við starfsemi Fossa með þeim hætti að ÍV verður skipt upp og hluti þess sameinaður Fossum. Hins vegar er fyrirhugað að sameina ÍVS og SIV þar sem ÍVS er yfirtökufélag, en sameinað félag mun starfa undir heitinu Íslensk verðbréf.
Í báðum tilvikum munu skiptin og samrunar miðast við 1. janúar 2025 en fyrirvari er um samþykki fjármálaeftirlits Seðlabanka Íslands og staðfestingu fyrirtækjaskrár Skattsins.
Samhliða þessu hefur verið gengið frá samkomulagi um kauprétt Skaga (VÍS og Fossar) á alls 14,40% hlut í sameinuðu félagi SIV og ÍVS af minnihlutaeigendum sameinaðs félags.
Kaupréttarsamkomulagið gerir ráð fyrir mögulegri nýtingu kaupréttar í upphafi ársins 2026.
Verði kauprétturinn nýttur af hálfu Skaga, er gert ráð fyrir að seljendur hlutanna fái kaupverðið greitt með hlutabréfum í Skaga.
Jafnframt er skilyrði um sölubann seljenda á hlutabréfum sem þeir fá afhent í Skaga og að sölubann gildi til tveggja ára. Samkomulagið er gert með fyrirvara um samþykki hluthafa fyrir útgáfu nýs hlutafjár í Skaga til að mæta kaupverðinu.
„Með sameiningu SIV eignastýringar og ÍV-sjóða undir heitinu Íslensk verðbréf verður til öflugt eigna- og sjóðastýringarfélag með hátt í 200 milljarða króna í stýringu. Arnór Gunnarsson verður framkvæmdastjóri Íslenskra verðbréfa og Jón Helgi Pétursson rekstrarstjóri. Sameinað félag mun byggja á öflugu teymi sjóðstjóra frá SIV og ÍV-sjóðum með áratuga reynslu í fjárfestingum, en starfsemi félagsins skiptist í eigna- og sjóðastýringu,” segir í Kauphallartilkynningu.
Fjárfestingasafn VÍS trygginga verður áfram í stýringu hjá eignastýringarsviði félagsins sem Arnór mun veita forstöðu en auk þess eru sérgreind söfn fyrir fagfjárfesta og stofnanafjárfesta í stýringu félagsins.
Þorkell Magnússon mun veita sjóðastýringu forstöðu en félagið mun bjóða upp á fjölbreytta valkosti opinna og lokaðra sjóða fyrir almenna fjárfesta jafnt og fagfjárfesta.
Í tilkynningu segir að Íslensk verðbréf stefni á frekari vöxt á innlendum eignastýringarmarkaði með hagsmuni viðskiptavina og langtímaárangur þeirra að leiðarljósi.
Skagi, móðurfélag VÍS, hefur undirritað kaupsamning við hluthafa Íslenskra verðbréfa hf. (ÍV) um kaup Skaga á 97,07% hlutafjár í félaginu fyrir 1.598 milljónir króna í mars á þessu ári.
Íslensk verðbréf, sem var stofnað árið 1987, er eitt elsta starfandi fjármálafyrirtæki landsins. Félagið býður upp á þjónustu á sviði markaðsviðskipta, eigna- og sjóðastýringar og var með 96 milljarða króna í stýringu um síðustu áramót.
Alls voru um 4.000 viðskiptavinir með fjármuni í eignastýringu og vörslu hjá Íslenskum verðbréfum í lok árs 2023.
