Hildur Sverrisdóttir, þingflokksformaður Sjálfstæðisflokksins, sagði Alþingi rétt í þessu að það væri óumdeilt að framúrskarandi lífskjör íslensku þjóðarinnar byggi á samkeppnishæfni útflutningsstoða okkar, undirstöðuatvinnugreinum þjóðarinnar; ferðaþjónustu, hugviti, framleiðslu á áli og sjávarútvegi.
Hún gerði þar ákvörðun ríkisstjórnarinnar um að tvöfalda veiðigjald á íslenskan sjávarútveg að umtalsefni en Hanna Katrín Friðriksson atvinnuvegaráðherra og Daði Már Kristófersson fjármálaráðherra kynntu aðgerðina í hádeginu í dag.
„Í stefnuyfirlýsingu ríkisstjórnarinnar er skýrt kveðið á um að stefna skuli að aukinni verðmætasköpun í íslensku hagkerfi. Það ætti því að vera ríkisstjórninni kappsmál að styðja við samkeppnishæfni þessara undirstöðuatvinnugreina sem og annarra, fjölga störfum og þannig styðja hagvöxt og lífskjör. Stundum þýðir það einfaldlega að ríkið þurfi að gera minna,“ sagði Hildur.
Það virðist þó ekki vera stefna ríkisstjórnarinnar að hennar mati sem ætlar í tilfelli ferðaþjónustunnar og sjávarútvegs „að gera meira.“
„Mikilvægt er að almenn sátt ríki um starfsemi atvinnugreina hér á landi hvað sem þær heita. Reglur eru vissulega mannanna verk og ekki skrifaðar í stein. Það er sjálfsagt að skoða hvort tilefni sé til að breyta þeim. Samhliða er mikilvægt að hafa í huga að íslenskur sjávarútvegur er burðarás í atvinnulífi um land allt,“ sagði Hildur á Alþingi.
„Á undanförnum áratugum hefur verið gripið til ýmiss konar aðgerða til að gera íslenskan sjávarútveg sjálfbæran og arðbæran þannig að óvíða í heiminum er sjávarútvegur rekinn á eins hagkvæman hátt. Þessi eftirsóknarverða staða varð ekki til úr engu heldur byggir hún á rannsóknum og ákvörðunum út frá þeim. Allar breytingar á kerfinu sem til umræðu eru verða að skoðast með þetta til hliðsjónar. Hér er mikið í húfi og mikilvægt að vanda til verka,“ sagði Hildur.
