Ríkisstjórn Ítalíu hyggst eyða 24 milljörðum evra, sem nemur 3.500 milljörðum króna, í skattalækkanir og launahækkanir innan opinbera geirans á næsta ári til að ýta undir neyslu og styðja við frekari vöxt.

Ríkisstjórnin samþykkti fjárlagafrumvarp næsta árs í vikunni og sagði Giorgia Meloni, forsætisráðherra Ítalíu, að fjárlögin væru alvarleg og raunsæ. Margir hafa þó áhyggjur af stöðu fjármála í landinu.

Ítalir greindu frá því í síðasta mánuði að stefnt væri á að halli ríkissjóðs yrði 4,3% af vergri landsframleiðslu á næsta ári en í apríl var miðað við 3,7% halla. Þá muni þau ekki ná að fylgja tilskipun Evrópusambandsins um að halli ríkissjóðs sé undir þremur prósentum fyrr en árið 2026.