Heiðar Guðjónsson, hagfræðingur og fyrrverandi forstjóri Sýnar, er ekki lengur í stjórn Íslandspósts líkt Viðskiptablaðið greindi frá í byrjun apríl.
Í samtali við Viðskiptablaðið segir Heiðar ástæðuna vera gríðarlega íþyngjandi regluverk sem fylgir stjórnarsetu í ríkisfyrirtækjum en allir einstaklingar sem setjast í stjórn og allir tengdir þeim fara í áhættuhóp vegna stjórnmálalegra tengsla.
Heiðar Guðjónsson, hagfræðingur og fyrrverandi forstjóri Sýnar, er ekki lengur í stjórn Íslandspósts líkt Viðskiptablaðið greindi frá í byrjun apríl.
Í samtali við Viðskiptablaðið segir Heiðar ástæðuna vera gríðarlega íþyngjandi regluverk sem fylgir stjórnarsetu í ríkisfyrirtækjum en allir einstaklingar sem setjast í stjórn og allir tengdir þeim fara í áhættuhóp vegna stjórnmálalegra tengsla.
„Ekki vinnandi vegur“
Ákvörðun Heiðars um að taka sæti í stjórn Íslandspósts hafði þannig íþyngjandi áhrif á samstarfsmenn hans á öðrum vettvangi sem og alla sem sitja með honum í öðrum stjórnum.
„Ef þú tekur sæti í stjórn ríkisfyrirtækis þá fer maður á lista vegna aðila sem eru í áhættuhóp vegna stjórnmálalegra tengsla og ég vissi alveg af því. En ég vissi ekki að ég myndi smita alla aðra sem ég er með í öðrum stjórnum af sama stimpli,“ segir Heiðar.
„Sumir gætu misst viðskiptasamband við banka og þurfa alltaf að gera grein fyrir öllum viðskiptum fyrir fram og fá leyfi o.s.frv. Þannig þetta var ekki vinnandi vegur. Það er bara búið að innleiða þessar reglur svo vitlaust hérna,“ segir Heiðar.
Lögin kosta Íslendinga milljarða á ári
Um er að ræða lög um aðgerðir gegn peningaþvætti og fjármögnun hryðjuverka en samkvæmt þeim eru allir einstaklingar, fjölskylda þeirra og nánir samstarfsmenn í áhættuhópi ef þeir taka háttsetta stöðu í opinberri þjónustu.
Lögin hafa sætt mikilli gagnrýni hér heima en þau skylda m.a. fyrirtæki og einstaklinga til að setja sig í löggæsluhlutverk. Þá kosta þau atvinnulífið margar milljarða á ári í framkvæmd.
„Fyrir íslenskt atvinnulíf hleypur kostnaðurinn vafalaust á mörgum milljörðum króna árlega en erfitt er að meta af nokkurri nákvæmni hver ávinningurinn af þessu er í baráttunni við peningaþvætti,“ sagði lögmaðurinn Ingvar Smári Birgisson í samtali við mbl.is í haust.