Athafnamaðurinn Jón Ásgeir Jóhannesson var kjörinn stjórnarformaður Skeljungs á aðalfundi félagsins sem haldinn var í gær.
Eins og Viðskiptablaðið sagði frá í byrjun vikunnar voru sjö einstaklingar í framboði til stjórnar, en Jón Ásgeir kom inn í stjórnina fyrir ári síðan og hefur verið varaforseti stjórnar.
Jón Ásgeir, ásamt Dagnýu Halldórsdóttur og Elínu Jónsdóttur sitja jafnframt í starfskjaranefnd, og loks kaus stjórnin Þórarinn Arnar Sævarsson í tilnefningarnefnd af sinni hálfu. Hluthafafundurinn samþykkti jafnframt nýja starfskjarastefnu með breyttu og einfölduðu kaupaukakerfi, en hámark kaupauka er þrenn mánaðarlaun, sem samsvari 25% viðbót við árslaun starfsmanns.
Á móti var felld út heimild til að greiða kaupauka vegna starfsloka starfsmanna sem hafa unnið í 20 til 40 ár hjá félaginu en forstjóri fær á móti heimild til að greiða tveggja mánaða laun við sérstakar aðstæður.
Tveir frambjóðendur, sem ekki hlutu náð tilnefninganefndar komust ekki í stjórnina, það eru þeir:
- Már Wolfgang Mixa
- Jón Gunnar Borgþórsson
Í stjórnina voru hins vegar kjörin þau:
- Birna Ósk Einarsdóttir
- Dagný Halldórsdóttir
- Elín Jónsdóttir
- Jón Ásgeir Jóhannesson
- Þórarinn Arnar Sævarsson
Samþykkt var tillaga um óbreytt kjör stjórnarmanna, undirnefnda og endurskoðenda, og eru þau sem hér segir:
- a. Stjórnarformaður: 650.000 kr. mánaðarleg greiðsla
- b. Varaformaður stjórnar: 450.000 kr. mánaðarleg greiðsla
- c. Meðstjórnendur: 320.000 kr. mánaðarleg greiðsla
- d. Formaður endurskoðunarnefndar: 100.000 kr. mánaðarleg greiðsla
- e. Nefndarmaður endurskoðunarnefndar: 60.000 kr. mánaðarleg greiðsla
- f. Formaður starfskjaranefndar: 60.000 kr. mánaðarleg greiðsla
- g. Nefndarmaður starfskjaranefndar: 30.000 kr. mánaðarleg greiðsla
- h. Formaður tilnefningarnefndar: 20.000 kr./klst. í verktöku
- i. Utanaðkomandi nefndarmaður tilnefningarnefndar: 20.000 kr./klst. í verktöku
- j. Stjórnarmaður í tilnefningarnefnd: 60.000 kr. eingreiðsla
- k. Endurskoðandi: samkvæmt reikningum
