Bæjarstjórn Hafnarfjarðarbæjar samþykkti í vikunni að kaupa stærstan hluta eignarinnar Óseyrarbraut 2, húsnæði Kænunnar við smábátahöfnina.
Samkvæmt Fjarðarfréttum er kaupverðið 265 milljónir króna en húsnæðið er um 324 m² og stendur á 2.363 m² leigulóð. Bærinn er að kaupa um 70% eignarhlut.
Heimildir héraðsmiðilsins herma að bærinn sé ekki einungis að greiða fyrir húsnæðið heldur er einnig tekið tillit til þess að verið er að kaupa út starfsemi í fullum rekstri.
Samkvæmt fasteignaskrá er fasteignamat eignarhlutarins 63,2 milljónir og brunabótamat 139,25 milljónir.
Bæjarstjórn hyggst rífa húsnæðið og rýma fyrir byggingu Tækniskólans á svæðinu en til þess að það gerist þarf að rífa fleiri eignir á svæðinu.
Oddsteinn Gíslason, eigandi Matbæjar, sagði í samtali við Fjarðarfréttir að rekstri Kænunnar verði hætt við afhendingu húsnæðisins.
Hann hafi leitað að hentugu húsnæði en ekki fundið neitt sem hentar. Segir hann rekstur Kænunnar hafa gengið gríðarlega vel síðustu ár og hafi metfjöldi matargesta komið í Kænuna á síðasta ári.
Afhending eignarinnar er 1. desember 2028 en fram að þeim tíma hefur Matbær ehf., sem rekur Kænuna, fullt umráð yfir eigninni.
