Ívera íbúðafélag, áður Heimstaden, hefur gengið frá samningum við dótturfélag KEA um kaup hins síðarnefnda á um 120 íbúðum Íveru á Akureyri. Kaupverð eignanna nemur rúmum 5 milljörðum króna.
Ívera hefur nýverið gefið út áform um tvöföldun á eignasafni sínu sem er í dag um 1.600 íbúðir. Samkvæmt tilkynningu frá félaginu er sala eignanna á Akureyri liður í endurskipulagningu eignasafnsins og styrkir undirstöður félagsins fyrir frekari vöxt.
„Það er ánægjulegt að skerpa á rekstri félagsins með þessari endurskipulagningu í okkar rekstri og horfa á eftir eignunum á Akureyri í hendur trausts aðila með metnaðarfull langtímaáform. Eignirnar eru vel staðsettar og hafa verið eftirsóttar á leigumarkaði. KEA er rótgróinn fjárfestir í sínu nærumhverfi og gildi þeirra fara vel saman við okkar. Ég trúi að leigutakarnir verði ánægðir með þessi viðskipti,“ segir Egill Lúðvíksson, forstjóri Íveru.
Ívera greinir frá því að báðir aðilar höfðu í viðræðunum lagt áherslu á áframhaldandi húsnæðisöryggi fyrir leigutaka íbúðanna en stefna KEA er að reka íbúðasafnið til langs tíma og stefnir félagið á frekari vöxt á þessu sviði.
Viðskiptin munu því ekki hafa neikvæð áhrif á núverandi leigutaka en þau marka þó brotthvarf Íveru af íbúðamarkaði á Akureyri og félagið stefnir ekki á frekari umsvif þar í náinni framtíð.
Ein stærsta fjárfesting KEA í langan tíma
Halldór Jóhannsson, framkvæmdastjóri KEA, segir að um sé að ræða einu stærstu fjárfestingu félagsins í nokkurn tíma. Hún er liður í þeim breyttu áherslum hjá félaginu að auka verulega vægi fasteignatengdra verkefna á efnahagsreikningi sínum ásamt því að fækka og stækka þau verkefni sem eru á höndum félagsins.
Ásamt því að reka íbúðaleigufélag stefni KEA á að taka þátt í ýmiss konar þróunarverkefnum á fasteigna- og íbúðamarkaði á sínu nærsvæði.
„Þessi kaup eru fyrsta skref KEA inn á íbúðaleigumarkaðinn hér á nærsvæði okkar en í gegnum dótturfélagið Skálabrún hyggst KEA byggja upp til lengri tíma safn íbúða til almennrar útleigu,“ segir Halldór.
„Það er ekkert stórt sérhæft og staðbundið félag um leigu íbúða á almennum markaði hér á þessu svæði og við erum að breyta þeirri umgjörð með þessum kaupum. Það hefur skort félag eins og þetta á þessum markaði og þessi fjárfesting muni til lengri tíma styrkja almennan íbúðaleigumarkað á svæðinu.“
Stefnt er að afhendingu eignanna fyrir jól.
