Mjöll Matthíasdóttir, formaður Félags grunnskólakennara, segir í samtali við Vísi að hún telji sanngjarnt að grunnlaun kennara verði rúm milljón króna.
Verkfallsaðgerðir kennara hefjast að óbreyttu eftir helgi en Félagsdómur dæmdi skæruverkföll kennara lögleg í morgun.
Kennarar telja að miða eigi kjör þeirra við meðallaun sérfræðinga á almennum vinnumarkaði. Mjöll segir það „eina sanngjarna viðmiðið“ þar sem ekki væri hægt að miða við eina stétt sérfræðinga og para kennara.
„Hún losar einhverja rúma milljón í grunnlaunum þegar kennarar eru með rúm 700.000 að meðaltali,“ segir Mjöll við Vísi sem samsvarar um rúmlega 42% hækkun á grunnlaunum kennara.