Indó fékk starfsleyfi frá Seðlabanka Íslands í febrúar 2022 og opnaði formlega á veltureikninga fyrir almenning í lok janúar 2023. Í kjölfarið opnaði indó á sparireikninga og hefur nú nýlega hafið innreið sína á útlánamarkað.
Í dag eru viðskiptavinir indó tæplega sextíu þúsund talsins, en félagið sótti milljarð króna með hlutafjáraukningu í desember til að fjármagna innreið sína á útlánamarkað. Fjármagnið fór að stærstum hluta í að uppfylla eiginfjárkröfur fyrir slíka starfsemi.
Indó fékk starfsleyfi frá Seðlabanka Íslands í febrúar 2022 og opnaði formlega á veltureikninga fyrir almenning í lok janúar 2023. Í kjölfarið opnaði indó á sparireikninga og hefur nú nýlega hafið innreið sína á útlánamarkað.
Í dag eru viðskiptavinir indó tæplega sextíu þúsund talsins, en félagið sótti milljarð króna með hlutafjáraukningu í desember til að fjármagna innreið sína á útlánamarkað. Fjármagnið fór að stærstum hluta í að uppfylla eiginfjárkröfur fyrir slíka starfsemi.
„Þegar við töldum okkur hafa skilið inn- og útflæði veltuinnlánanna nægilega vel þá fórum við í sparireikninga fyrir um ári síðan. Þar sáum við mikinn vöxt í fjölda nýrra viðskiptavina og virkni þeirra. Við vildum í kjölfarið bjóða upp á fjölbreyttari þjónustu til að auðvelda líf viðskiptavina okkar enn frekar, og komum með nokkrar stórar vörur í maí síðastliðnum. Það eru yfirdráttarlán, fyrirframgreidd laun og reikninga fyrir ungmenni,“ segir Haukur Skúlason, framkvæmdastjóri og annar stofnenda indó.
Haukur segir vörurnar þrjár aðeins öðruvísi en sambærilegar vörur samkeppnisaðila.
„Í fyrsta lagi virka yfirdráttarlánin þannig að vextirnir á lánunum lækka ef lántakinn ætlar sér að greiða hann niður jafnt og þétt. Þannig viljum við stuðla að fjárhagslegu heilbrigði okkar viðskiptavina. Fyrirframgreidd laun er ný vara á markaðnum. Þar bjóðum við fólki 25 þúsund króna vaxtalaust lán á síðustu sjö dögum mánaðarins. Það lán er endurgreitt strax upp úr mánaðarmótum þegar laun fólks koma inn á launareikning.
Reikningar fyrir ungmenni á aldrinum 13-17 ára snúast síðan um samspil milli þeirra og forráðamanna, sem fá aðgang að greiðsluyfirliti unglingsins. Síðan eru reikningarnir stilltir sjálfkrafa þannig að ungmennin geti ekki verslað við tiltekna söluaðila. Þau geta t.a.m. ekki stundað veðmál eða keypt áfengi og tókbak, né keypt áskrift á OnlyFans,“ bætir Haukur við.
Komin til að vera
Haukur segir ljóst að indó sé orðið alvöru afl á fjármálamarkaði. Það ætli sér ekki endilega að verða stærsti þátttakandinn á markaðnum, heldur sé markmiðið að hrista upp í hlutunum og nálgast hlutina öðruvísi.
„Við erum komin til að vera. Það eru margir aðilar sem vonuðu að þetta yrði skemmtileg tilraun sem gengi ekki. En við erum nú með ágætis hlutdeild á innlánsmarkaði og 11% af debetkortafærslum á Íslandi. Við erum alvöru spilari á markaðnum og munum halda áfram að þróa nýjar vörur, nýja þjónustuþætti og hrista upp í samkeppninni. Við erum öll stíluð á að gera líf viðskiptavina aðeins léttara, gera lífið þægilegra.
Við ætlum ekkert endilega að verða stærst, en við viljum hafa þau áhrif á okkar samkeppnisaðila að þeir fari að nálgast hlutina öðruvísi. Annars komi einfaldlega fleiri félög eins og indó sem taki sífellt stærri hluta af kökunni.“
Nánar er rætt við Hauk í Viðskiptablaðinu sem kom út í vikunni.
