Kristrún Frostadóttir forsætisráðherra og formaður Samfylkingarinnar sagði fyrir tveimur árum að launahækkanir þingmanna og ráðherra gengju ekki upp.
Kristrún Frostadóttir, formaður Samfylkingarinnar, segir að launahækkun helstu ráðamanna þjóðarinnar, sem koma á til framkvæmdar 1. júlí, gangi ekki upp. Það sé ríkisstjórnarinnar að beita sér gegn henni.
„Það er mín skoðun að þetta gangi ekki upp. Þetta eru kolröng skilaboð til vinnumarkaðarins.“
Einnig sagði hún.
„Það er víða búið að semja, bæði á opinbera og almenna vinnumarkaðnum um ákveðið þak til að koma í veg fyrir að launin hækki alveg upp á við og ákveðinn vítahringur skapist.
Ef normið er orðið það að það er verið að setja þak á efstu laun og við fylgjum ekki því normi, þá gengur það ekki upp að mínu mati.“
Kristrún lét þessi orð falla í viðtali við Ríkisútvarpið í lok maí 2023.
Í dag sagði Kristrún Frostadóttir forsætisráðherra að ríkisstjórnin þurfi að taka ákvörðun til lengri tíma um hvaða mælikvarði verði notaður til að reikna hækkun á launum æðstu ráðamanna.
Hún segist sýna því fullan skilning að launahækkun æðstu ráðamanna upp á 5,6 prósent veki gremju. Sér hugnist þó ekki að ríkisstjórnin sé að handstýra launum á hverju ári, rétt fyrir þinglok. Því muni launahækkunin standa. Þetta sagði hún í samtali við Morgunblaðið í dag.
„Ég sýni því fullan skilning, að það veki gremju þegar það er samið um ákveðna tegund launahækkana á almenna vinnumarkaðnum eða jafnvel opinberra og laun æðstu ráðamanna hækka umfram það. Mér finnst það bara mjög eðlilegt.“
Laun þingmanna, ráðherra, forseta Íslands og æðstu embættismanna hækka um 5,6% næstu mánaðamót. Þingfararkaupið verður rúmlega 1,6 milljónir króna á mánuði eftir breytinguna og nemur hækkunin 85 þúsund krónum.
Laun ráðherra verða rúmar 2,6 milljónir króna en laun forsætisráðherra um 2,9 milljónir króna á mánuði. Laun forseta Íslands verða 4,25 milljónir króna og dómarar við Hæstarétt fá rúmar 2,7 milljónir króna.
