Nafngengi Bandaríkjadals gagnvart íslensku krónunni hefur lækkað um 0,9% í dag og hefur ekki verið lægra í fjögur ár eða frá því í júní 2021 samkvæmt gagnagrunni Seðlabanka Íslands.
Íslenska krónan hefur styrkst um 13,7% gagnvart Bandaríkjadalnum í ár en það skýrist að stórum hluta að því að dalurinn hefur veikst gagnvart helstu gjaldmiðlum heims undanfarna mánuði.
Til samanburðar hefur krónan styrkst um 1,2% gagnvart evrunni og um 4,0% gagnvart pundinu frá áramótum. Gengi evrunnar gagnvart krónunni stendur nú í 142,0 og pundsins í 166,7.
Dalurinn náði í dag sínu lægsta nafngengi gagnvart bæði evrunni og pundinu frá því á árinu 2021, að því er kemur fram í frétt Reuters.
Í umfjöllun um krónuna í nýjasta riti Peningamála, sem Seðlabankinn gaf út í maí, segir að meðal þátta sem hafi stutt við gengi krónunnar sé nokkurt fjármagnassinnflæði vegna kaupa erlendra aðila á innlendum ríkisbréfum í febrúar auk þess sem gjaldeyrisviðskipti lífeyrissjóða hafi verið minni það sem af er ári en á seinni hluta árs 2024.
Minni eftirspurn lífeyrissjóða eftir erlendum gjaldeyri tengist m.a. uppgjöri vegna kaupa JBT á Marel í byrjun janúar en sjóðirnir fengu að hluta greitt í erlendum gjaldeyri. Þá fengu sjóðirnir einnig rúmlega 50 milljarða króna af gjaldeyri í tengslum við uppgjör ÍL-sjóðs.
„Þá er mögulegt að lífeyrissjóðir haldi að sér höndum þegar kemur að erlendri fjárfestingu á meðan mikil óvissa ríkir á alþjóðlegum mörkuðum,“ segir í Peningamálum.
„Á móti hefur verið hreint útflæði vegna greiðslukortanotkunar á fyrstu fjórum mánuðum ársins og hefur útflæðið verið meira en á sama tíma í fyrra. Þá hefur dregið úr framvirkri stöðutöku með krónunni sem bendir til þess að fjárfestar búast ekki við frekari hækkun á gengi krónunnar.“
Seðlabankinn hóf reglubundin gjaldeyriskaup í apríl síðastliðnum. Þá tilkynnti bankinn fyrir tveimur vikum um að hann hygðist tvöfalda reglubundin gjaldeyriskaup sín og verða þau nú 12 milljónir evra í hverri viku.
