Í síðastliðnum mánuði hefur íslenska krónan styrkst um 1,9% gagnvart svissneska frankanum. Gengi frankans hefur lækkað úr 155,6 krónum í 152,7 krónur á tímabilinu.
Þetta er jákvæð þróun fyrir þá Íslendinga sem hyggjast fylgja kvennalandsliðinu á Evrópumeistaramótið í Sviss í næsta mánuði. Fyrsti leikur Íslands á Evrópumótinu í Sviss er gegn Finnum 2. júlí í Thun.
Frankinn hækkaði talsvert í apríl þegar fjárfestar leituðu í örugga gjaldmiðla eftir að Donald Trump kynnti nýjar tollaaðgerðir og fjárfestar leituðu í aðra gjaldmiðla en Bandaríkjadal, m.a. svissneska franka.
Undið hefur ofan af þeirri þróun upp á síðkastið samhliða því að krónan er að styrkjast.
Á sama tímabili hefur krónan styrkst um 1,6% gagnvart evru og hefur evran farið úr 145,9 krónum í 143,6 krónur.
Bandaríkjadalur, sem hefur verið í sögulegri lægð á árinu, hefur veikst töluvert gagnvart krónunni.
Krónan hefur styrkst um 3,8% gagnvart Bandaríkjadal og farið úr 129,8 krónum í 124,9 krónur á einum mánuði.
