Stjórn Samtaka atvinnulífsins (SA) geldur varhug við fyrirætlunum ríkisstjórnarinnar við lagasetningu gagnvart íslenskum sjávarútvegi.
„Raungerist áhyggjur samtakanna er ljóst að breytingar sem ríkisstjórnin hefur boðað muni draga úr hagvexti og lífskjarasókn Íslendinga,“ segir í ályktun stjórnar SA.
Hanna Katrín Friðriksson atvinnuvegaráðherra og Daði Már Kristófersson fjármálaráðherra kynntu í hádeginu frumvarp um breytingu á lögum um veiðigjald. Áætlað er að breytingin leiði til tæplega tvöföldunar á greiddu veiðigjaldi, samkvæmt tilkynningu atvinnu- og fjármálaráðuneytanna.
Ríkisstjórnin áformar að breyta lögunum á þann veg að reiknistofn fyrir þorsk og ýsu mun miðast við verð á fiskmörkuðum innanlands. Fyrir uppsjávartegundirnar síld, kolmunna og makríl verður miðað við markaðsverð í Noregi yfir íslensk veiðitímabil.
Sjávarútvegur búi þegar við mikið ójafnræði
Stjórn SA segir íslenskan sjávarútveg vera ein af undirstöðuatvinnugreinum landsins, en hún búi þegar við mikið ójafnræði þegar kemur að rekstrarumhverfi og samanburði við aðrar greinar. Atvinnugreinin búi við skattlagningu umfram aðrar greinar, takmörk á umsvifum og eignarhaldi sem þekkist ekki í öðrum greinum og óvissuálags vegna stöðunnar í stjórnmálunum sem veldur bæði skorti á fyrirsjáanleika og torveldar ákvarðanatöku.
„Samtök atvinnulífsins minna á að lög um stjórn fiskveiða voru sett til þess að hámarka verðmætasköpun og sjálfbærni þannig að þjóðin fengi sem mestan ábata úr auðlindinni.“
Áhyggjur að kúvenda eigi rekstrarumhverfinu á örfáum vikum
SA segir útlit fyrir að boðaðar breytingar hafi verulega neikvæð áhrif á íslenskan sjávarútveg en einnig tengdar og afleiddar greinar. Auk hækkunar veiðigjaldsins sé boðað að hækka hækkun kolefnisskatta á atvinnuvegi, sem einnig muni að óbreyttu draga úr verðmætasköpun í sjávarútvegi, með afleiddum áhrifum á aðrar greinar.
„Það veldur verulegum áhyggjum að kúvenda eigi rekstrarumhverfi sjávarútvegs á örfáum vikum, án þess að samráð, fagleg umræða og vandað áhrifamat geti legið til grundvallar breytingum á umgjörð hans á Íslandi.“
Stjórn SA kallar eftir því að breytingar á umgjörð og starfsumhverfi sjávarútvegs á Íslandi, líkt og allra annarra atvinnugreina, verði unnar í nánu samráði við atvinnulífið, að þær byggi á staðreyndum og faglegri umræðu, skilningi á gangverki og eðli atvinnugreina, og mati á áhrifum á innlendan efnahag og samkeppnishæfni Íslands.
Varhugavert í ljósi tollastríðs og óróa í alþjóðastjórnmálum
Stjórn SA segir aðgerðir ríkisstjórnarinnar undanfarnar vikur sem og boðaðar breytingar á rekstrarumhverfi sjávarútvegsins vera til þess fallnar að grafa undan hvort tveggja stöðugleika og samkeppnishæfni íslenska hagkerfisins. Telja samtökin það sérstaklega varhugavert í ljósi þeirrar óvissu sem ríkir á mörkuðum um allan heim, yfirvofandi tollastríðs og óróa í alþjóðastjórnmálum.
„Nú er tíminn til að Íslendingar snúi bökum saman, gæti sinna hagsmuna og verji lífskjör og verðmætasköpun. Samtökin lýsa sig reiðubúin til samtals líkt og ávallt, en forsenda slíks samtals er að raunverulegur vilji sé til þess að taka tillit til sjónarmiða atvinnulífsins og einstakra atvinnugreina.“
Ríkisstjórnin grafið undan stöðugleika á vinnumarkaði
Stjórn SA segir að ekki verði framhjá því litið, að mikilvægur áfangi í átt að stöðugleika í efnahagsmálum hafi náðst við gerð kjarasamninga á almennum vinnumarkaði á síðasta ári. Kjarasamningar á almennum vinnumarkaði hafi verið gerðir í því trausti að aukin verðmætasköpun stæði undir þeim kostnaðarauka sem þeir fælu í sér fyrir atvinnulífið. Það sé sameiginlegt verkefni að tryggja hagfelld undirliggjandi skilyrði kjarasamninga.“
„Það voru mikil vonbrigði að þeirri launastefnu sem mörkuð var á almennum vinnumarkaði hafi ekki verið fylgt við gerð kjarasamninga við kennara. Sér í lagi eru það vonbrigði að ríkisstjórnin hafi lýst yfir eindregnum og opinberum stuðningi við samninga sem sveigðu af þeirri braut sem mörkuð var á hinum almenna markaði. Telja samtökin að með því hafi ríkisstjórnin grafið undan stöðugleika á vinnumarkaði og þar með hagkerfinu í heild sinni.
Samtök atvinnulífsins árétta að þau muni hér eftir, sem hingað til, standa sameinuð með hverjum þeim stjórnvöldum sem stuðla að aukinni verðmætasköpun á Íslandi en jafnframt í andstöðu við hver þau stjórnvöld sem veikja eða grafa undan verðmætasköpun hérlendis, efnahagslegur styrkur er enda forsenda öryggis þjóðarinnar.“
