Kvika banki hefur ákveðið að hafna erindum Arion banka og Íslandsbanka um að hefja formlegar samrunaviðræður.
Í tilkynningu sem bankinn birti í dag kemur fram að stjórnin hafi farið yfir erindin sem bárust þann 27. og 28. maí síðastliðinn og metið þau út frá virði Kviku. Niðurstaða stjórnar er sú að erindin endurspegli ekki virði félagsins og því séu ekki forsendur fyrir því að hefja viðræður á þeim grunni.
„Að vel skoðuðu máli er það mat stjórnar Kviku að hvorki erindi Arion banka hf. né Íslandsbanka hf. endurspegli virði Kviku,“ segir í tilkynningunni. Því hafi þeim verið svarað neitandi.
Þrátt fyrir þá ákvörðun leggur stjórnin áherslu á að hún telji umtalsverð tækifæri og verðmæti geta falist í sameiningu með öðrum fjármálafyrirtækjum, hvort heldur er fyrir hluthafa eða viðskiptavini. Stjórnin er því tilbúin að endurmeta afstöðu sína ef aðilar eru reiðubúnir að endurskoða þær forsendur sem lagt var upp með um virði Kviku.
