Bandaríski fjárfestingabankinn Goldman Sachs hefur ákveðið að lækka lágmarksfjárfestingu um 90% í nýjum sjóði sem ætlar að fjárfesta í sérhæfðum einkamarkaðssjóðum bankans.
Nýi sjóðurinn er hluti af 1869-áætluninni, sem heitir eftir stofnári bankans, en um er að ræða sambærilegan sjóð og var stofnaður árið 2022, samkvæmt heimildum blaðamanna Financial Times.
Nú hefur lágmarksfjárfestingin verið lækkuð úr 250.000 dollurum niður í 25.000 dollara til að laða að fleiri fjárfesta. Fyrri sjóðurinn vakti töluverða athygli meðal fyrrverandi samstarfsaðila bankans, en rúmlega helmingur fyrrverandi stjórnenda Goldman Sachs tók þátt og safnaðist um 1 milljarður dollara í sjóðinn.
Aukin áhersla á einkamarkaði
Goldman Sachs eykur nú umfang sitt á einkamarkaði, sem hefur vaxið gríðarlega á undanförnum árum og orðið mikilvægur hluti af fjárfestingarheimi Wall Street.
Nýi sjóðurinn veitir fyrrum stjórnendum bankans tækifæri til að fjárfesta með lægri gjöldum en almennt tíðkast. Stjórnendur greiða 0,63% í árlegt umsýslugjald og 6,3% af árangurstengdum gjöldum, sem er helmingi lægra en í sambærilegum sjóðum bankans.
David Solomon, forstjóri Goldman Sachs, hefur lagt mikla áherslu á uppbyggingu eignastýringardeildar bankans, sem gefur reglubundnar tekjur í formi umsýslugjalda – ólíkt sveiflukenndari tekjum frá fjárfestingarbankastarfsemi og viðskiptadeildum bankans.
Goldman Sachs stýrir nú eignum upp á 3,1 trilljón dollara, þar af um 336 milljörðum í sjóðum sem fjárfesta í óhefðbundnum eignaflokkum, svo sem í einkafjárfestingum, fasteignum og annars stigs fjárfestingarsjóðum.
Viðhalda tengslum við fyrrum starfsmenn
1869-áætlunin er liður í viðleitni Goldmans til að viðhalda tengslum við fyrrverandi samstarfsaðila bankans, sem oft taka við stjórnunarstöðum hjá helstu viðskiptavinum bankans – til dæmis hjá vogunarsjóðum, einkafjárfestingafélögum eða í stjórnsýslu.
Á meðal þekktra fyrrum samstarfsaðila má nefna Gary Cohn, fyrrverandi efnahagsráðgjafa Donalds Trump, Malcolm Turnbull, fyrrverandi forsætisráðherra Ástralíu, og Jim Esposito, forseta hjá Citadel Securities. Þrátt fyrir að Goldman hafi hætt formlegu samstarfsfyrirkomulagi eftir að bankinn fór á markað árið 1999 er félagið enn valið í hóp samstarfsaðila á tveggja ára fresti – og titillinn nýtur mikillar virðingar í bankageiranum.
Sambærileg tengslanet eru einnig til hjá ráðgjafarfyrirtækinu McKinsey, sem býður fyrrverandi starfsmönnum aðgang að eignastýringarfyrirtæki sínu, MIO Partners. MIO hefur byggst hratt upp og stýrir nú 23 milljörðum dollara í eignum.
Fyrirtækið hefur hins vegar sætt gagnrýni vegna mögulegra hagsmunaárekstra við ráðgjafastarfsemi McKinsey og er nú til skoðunar hvort það verði sjálfstætt félag.
