Hagnaður Landsbankans á þriðja ársfjórðungi nam 10,8 milljörðum króna og hefur því bankinn hagnast um 26,9 milljarða á fyrstu níu mánuðum ársins.
Hreinar vaxtatekjur bankans voru 44,1 milljarður króna og hreinar þjónustutekjur voru 8,1 milljarður króna.
Arðsemi eiginfjár var 11,7% á fyrstu níu mánuðum ársins samanborið við 10,5% á sama tímabili árið áður.
„Uppgjörið endurspeglar traustan rekstur og aukin umsvif. Bankinn er í sókn á öllum sviðum og þjónustutekjur eru sterkar, enda höfum við lagt áherslu á að bæta við nýjum þjónustuþáttum og auka hlutdeild bankans. Sífelld þróun á Landsbankaappinu og nýjungar skila sér greinilega í aukinni notkun, ekki síst á meðal ungs fólks. Þetta á til dæmis við um lífeyrissparnað, en samningum um lífeyrissparnað við ungt fólk hefur verið gert í samningum um lífeyrissparnað við ungt fólk fjölgaði um 17,3% eftir að þessum möguleika var bætt við í appinu,“ segir Lilja Björk Einarsdóttir, bankastjóri Landsbankans.
Vaxtamunur sem hlutfall af meðalstöðu heildareigna nam 2,9% og vaxtamunur heimila hækkar úr 2% í 2,1% vegna hækkunar á bindiskyldu.
Virðisbreytingar útlána voru neikvæðar um 2,0 milljarða króna en bankinn segir í uppgjöri að það megi rekja að stórum hluta til óvissu um fjárhagslegar afleiðingar náttúruhamfaranna á Reykjanesskaga.
„Undanfarin ár hefur hærra vaxtastig skilað sér í góðri ávöxtun lausafjár bankans en um leið hefur fjármögnun bankans orðið dýrari, sér í lagi vegna hærri vaxta á innlánum, sem skilar sér beint til viðskiptavina í formi betri ávöxtunar sparifjár. Sem dæmi má nefna að bestu vextir á innlán fyrirtækja hjá bankanum eru nú 8,64% á ári. Vaxtamunur bankans í heild hefur lækkað frá fyrri fjórðungi og vaxtamunur heimila, sem er munur á óbundnum íbúðalánavöxtum og vöxtum á óbundnum sparnaði, er nú 2,1%“ segir Lilja.
Kostnaðarhlutfall Landsbankans var 32,3% á fyrstu níu mánuðum ársins samanborið við 34,6% á sama tímabili árið 2023.
Eiginfjárhlutfall í lok tímabilsins var 24,1% en fjármálaeftirlit Seðlabanka Íslands gerir 20,4% heildarkröfu um eiginfjárgrunn.
„Kröftugur útlánavöxtur á árinu kom okkur aðeins á óvart í ljósi hás vaxtastigs, en vel hefur gengið að fjármagna þennan vöxt og vanskil eru áfram lítil. Heildarútlán bankans hafa aukist um 155 milljarða króna, sem jafngildir um 9,5% vexti. Þar af eru 53,6 milljarðar króna vegna lána til einstaklinga og eru það nær allt íbúðalán. Vegna aukinnar eftirspurnar eftir verðtryggðum íbúðalánum og hærri fjármögnunarkjörum á verðtryggðum skuldabréfum, breyttum við framboði á verðtryggðum íbúðalánum, meðal annars í þeim tilgangi að draga úr eftirspurn. Við bjóðum áfram bestu kjörin meðal banka en hættum að veita jafngreiðslulán nema til fyrstu kaupenda. Mánaðarlegar greiðslur verða hærri en ella hjá þeim sem kjósa verðtryggð lán en á móti kemur að eignamyndun verður hraðari. Með þessu móti gátum við haldið vaxtahækkunum hóflegum og við teljum að þessi breyting komi sér betur fyrir langflesta viðskiptavini bankans,“ segir Lilja.