Líkt og Viðskiptablaðið greindi frá í gær keypti framtakssjóðurinn SÍA IV, sjóður í rekstri Stefnis, meirihluta hlutafjár í Interneti á Íslandi hf. (ISNIC).
ISNIC er skráningarstofa landshöfuðlénsins.is og sinnir rekstri þess auk þess að reka miðlæga Internettengipunktinn RIX. ISNIC hefur skráð.is-lén frá árinu 1988.
Íslenska ríkið var með forkaupsrétt í ISNIC samkvæmt lögum um íslensk landshöfuðlén sem Alþingi samþykkti árið 2021.
Samkvæmt bráðabirgðaákvæði laganna eignaðist ríkissjóður forkaupsrétt að öllum hlutum í Internet á Íslandi hf. en eigendur félagsins þurfa að tilkynna ríkisskattstjóra og Póst- og fjarskiptastofnun um beint og óbeint eignarhald í félaginu.
Samkvæmt heimildum Viðskiptablaðsins féll það í skaut Áslaugar Örnu Sigurbjörnsdóttur, þáverandi háskóla-, iðnaðar- og nýsköpunarráðherra, að nýta forkaupsréttinn eður ei.
Áslaug Arna ákvað ekki að stíga inn í viðskiptin og koma ISNIC í ríkiseigu en félagið hefur verið einkarekið frá árinu 1988.
SÍA IV er nær alfarið í eigu lífeyrissjóða en þrír stærstu lífeyrissjóðirnir, Gildi, Lífeyrissjóður verslunarmanna og lífeyrissjóður starfsmanna ríkisins eiga 42,8% hlut.
Tíu stærstu hluthafar félagsins eru allt lífeyrissjóðir sem fara samanlagt með um 83% hlut í SÍA IV.
Internet á Íslandi hf. hagnaðist um 151 milljón króna í fyrra, samanborið við 122 milljóna hagnað árið 2022. Tekjur félagsins námu 444 milljónum í fyrra.
Eignir ISNIC námu 405 milljónum króna og eigið fé var um 108 milljónir króna í árslok 2023.
Hluthafar ISNIC voru 21 í árslok 2023. Jens Pétur Jensen er stærsti hluthafi félagsins með 30,3% hlut.
Þar á eftir kemur Íslandspóstur hf. með 19,2% hlut, Magnús Soffaníasson með 17,2% hlut og Bárður Hreinn Tryggvason með 16,7% hlut.
