Landsvirkjun hefur samið við þýska vindmylluframleiðandann Enercon um kaup, uppsetningu og rekstur á 28 vindmyllum sem settar verða upp í Búrfellslundi við Vaðöldu.
Samkvæmt tilkynningu Landsvirkjunar verða fyrri 14 vindmyllurnar reistar snemma árs 2026 og gangsettar seinna um árið.
Reiknað er með að vindorkuverið verði að fullu tilbúið og komið í rekstur fyrir lok ársins 2027.
„Útboðsgögnin og öll vinna við útboðsferil og samningagerð var unnin með ráðgjöfum Landsvirkjunar, dönsku lögfræðiskrifstofunni Kromann Reumert og alþjóðlegu verkfræðistofunni Afry. Öll nauðsynleg leyfi lágu fyrir í október sl. Þrír framleiðendur tóku þátt í útboðsferlinu. Enercon GmbH átti hagkvæmasta tilboðið, 140 milljónir evra sem eru rúmir 20 milljarðar,“ segir í tilkynningu Landsvirkjunar.
Samkvæmt Landsvirkjun hefur Enercon mikla reynslu af uppbyggingu og rekstri vindmylla hér á landi því fyrirtækið framleiddi vindmyllurnar sem Landsvirkjun hefur rekið í tilraunaskyni á Hafinu frá 2013, auk þess sem vindmyllur í Þykkvabæ eru frá Enercon komnar.
Í samningi Landsvirkjunar og Enercon felst hönnun, framleiðsla, flutningur, uppsetning og prófanir á 28 vindmyllum.
„Þegar vindorkuverið er fullbúið tekur við þjónustusamningur til í það minnsta 15 ára. Áður en til kasta Enercon kemur verður lokið við vegagerð á svæðinu við Vaðöldu, auk þess sem byggja þarf vindmylluplön, smíða undirstöður undir vindmyllurnar o.fl. Sú mannvirkjagerð hefst á næsta ári, en stefnt er að útboði þess verks fyrir lok ársins.“
Samhliða uppbyggingu vindorkuversins við Vaðöldu hyggst Landsvirkjun reisa þjónustubyggingu fyrir vindorkuverið á Hellu.
