Í nýjasta tölublaði Viðskiptablaðsins er sagt frá nýrri greiningu frá Akkur - greiningu og ráðgjöf, þar sem lokagengi hlutabréfa Icelandair í lok árs er metið á 2,1 krónu á hlut. Til samanburðar var gengið við lokun markaða í gær 1,05.
Við endurskipulagningu félagsins í kjölfar Covid gerði Icelandair nýja kjarasamninga við flugmenn, flugfreyjur og flugvirkja. Þessir samningar leiddu til 10–25% aukinnar framleiðni, einkum vegna meiri sveigjanleika og betri nýtingar mannafla. Samningar við flugmenn og flugfreyjur renna út 30. september og við flugvirkja 31. desember 2025.
Sögulega hefur launakostnaður verið veikleiki hjá Icelandair, en í dag er hann í meðallagi miðað við önnur flugfélög. Akkur áætlar að meðallaunakostnaður á hvert stöðugildi hækki um 15% frá 2024 til 2026, og um 3–4% á ári þar eftir, sem jafngildir 4,6% meðalársvexti í launakostnaði til ársins 2032.
Horfurnar og markgengi
Þótt aðstæður í alþjóðlegum flugrekstri séu sveiflukenndar eru horfur fyrir Icelandair metnar fremur bjartar. Hagræðing og fjárfestingar í nýrri tækni, ásamt breyttri áherslu á arðsemi í stað umfangs, eru að skila jákvæðum árangri. Félagið hefur einnig náð að halda góðri sætanýtingu og hefur hún batnað frá ársfjórðungi til ársfjórðungs. Í skýrslu Akkurs kemur fram að félagið hafi burði til að bæta afkomu sína á næstu árum og ná betri nýtingu fjármagns. Greiningarfyrirtækið metur markgengi (e. target price) Icelandair í lok ársins 2,1. Gengi flugfélagsins við lokun markaða í gær var 1,05 krónur á hlut.
Nánar er fjallað um málið í Viðskiptablaðinu sem kom út í gær. Áskrifendur geta lesið fréttina í heild hér.
