Kirkbi, fjárfestingafélag Kristiansen-fjölskyldunnar sem er aðaleigandi Lego, hefur stofnað nýtt fjárfestingafélag, Kirkbi-Climate.
Samkvæmt Børsen hefur fjölskyldan ráðið Anupam Bhargava sem forstjóra en hann mun taka við stöðunni 1. febrúar næstkomandi.
Í fréttatilkynningu segir að Bhargava sé með mikla reynslu og sérþekkingu á sjálfbærni og auðlindaskilvirkni frá fyrirtækjunum eins og Nilfisk og Grundfoss.
„Kirk Kristiansen-fjölskyldan hefur sett sér framsýna langtímasýn um að gera verulegt átak í tengslum við hnattrænar loftslagsáskoranir. Með stofnun Kirkbi Climate og ráðningu Anupams höfum við lagt traustan grunn til að fylgja þessari sýn eftir,“ segir Søren Thorup Sørensen, forstjóri Kirkbi, í fréttatilkynningu.
Kirkbi stýrir nú loftslagsfjárfestingasafni sem nemur um 8 milljörðum danskra króna.
Með stofnun Kirkbi Climate og ráðningu Anupam Bhargava sem forstjóra hefur fyrirtækið sett sér markmið um að fjárfesta allt að 10 milljörðum danskra króna í loftslags- og orkumálum á næstu fimm árum.
Samvarar það um 194 milljörðum íslenskra króna á gengi dagsins.
Hluti af nýrri kynslóð
Stofnun Kirkbi Climate er hluti af kynslóðaskiptum þar sem Børsen greindi frá því á síðasta ári að Kirkbi vildi tryggja að áherslumálum og framtíðarsýn Kirk Kristiansen-fjölskyldunnar yrði framfylgt.
Af þeim sökum var Kirkbi Climate stofnað sem sjálfstætt félag.
„Kynslóðaskiptin hafa verið gott tækifæri til að skoða hvert áherslusvið næstu kynslóðar á að vera og hvaða leið fjölskyldan ætlar sér næst. Framtíðarauðlindirnar verða nýttar í leik barna, nám og loftslagsmál, og fjölskyldan hefur sett sér metnaðarfull markmið á þessum sviðum,“ sagði Søren Thorup Sørensen, forstjóri Kirkbi, á sínum tíma við Børsen.
Kirkbi hóf sínar fyrstu fjárfestingar í endurnýjanlegri orku árið 2012, þegar félagið, ásamt þáverandi Dong, nú Ørsted, fjárfesti í vindmyllugarði á hafi úti.
Síðan þá hafa metnaðarfyllri markmið í grænni umbreytingu og loftslagsmálum komið til sögunnar. Meðal annars eru hjá Kirkbi stórar áætlanir um nýtingu lands, þar sem fyrirtækið stefnir að því að umbreyta 10.000 hekturum – svæði á stærð við Amager – úr ræktarlandi í skóglendi.
Kirkbi hefur ekki birt ársreikning fyrir árið 2024 en hagnaður félagsins nam 3,7 milljörðum danskra króna árið 2023 sem samsvarar 74 milljörðum íslenskra króna á þáverandi gengi.
Árið var þó heldur stormasamt þar sem afskriftir settu strik í reikninginn.
Kirkbi þurfti að afskrifa um 1,8 milljarða danskra króna í tveimur Legoland-skemmtigörðum í eigu Merlin Entertainments en Kirkbi á 47,5% hlut í fyrirtækinu. Afskriftirnar eru hluti af um milljarða dala tapi Merlin í fyrra.
Stærsta eign félagsins er 75% hlutur í The Lego Group en hagnaður félagsins jókst um 20,7% milli ára og skilaði 16,4 milljörðum danskra króna hagnaði fyrir skatt.
„Þegar öllu er á botninn hvolft var þetta ágætis ár,“ sagði Søren Thorup Sørensen, framkvæmdastjóri Kirkbi, í uppgjörinu.
