Jan Lehrmann, þekktur danskur frumkvöðull og fjárfestir, hefur formlega bæst í hóp milljarðamæringa í Danmörku. Nýbirtur ársreikningur fjárfestingafélags hans, Lehrmann Family, sýnir 300 milljóna danskra króna hagnað í fyrra sem samsvarar um 5,7 milljörðum króna.
Eigið fé félagsins er nú komið upp í tæplega 1,2 milljarða danskra króna sem samsvarar um 23,1 milljarði íslenskra króna.
„Þetta var afar gott ár fyrir fjárfestingafélagið okkar, Lehrmann Family. Ég vil þakka öllum fyrirtækjunum sem við höfum fjárfest í fyrir gott samstarf og frábæran árangur,“ segir Lehrmann í tilkynningu til danska viðskiptamiðilsins Børsen.
Árangurinn byggist fyrst og fremst á verðhækkunum þeirra fyrirtækja sem Lehrmann hefur fjárfest í en þau spanna fjölbreytt svið atvinnulífsins.
Meðal þeirra eru verslunarkeðjan Normal, hugbúnaðarfyrirtækin Plecto og Softpay, fasteignaveitan Estaldo, vefverslunin Luksusbaby.dk og garðsláttarfyrirtækið DM Greenkeeping.
Nokkur þessara félaga eru í eigu í gegnum fjárfestingasjóðinn Lovemondays, sem einnig er í eigu Lehrmann.
Samkvæmt ársreikningnum hefur fjöldi virkra fjárfestinga minnkað úr 14 í 11, en á móti hefur fjárfestingarfé vaxið úr 871 milljón upp í rúmlega 1,1 milljarð danskra króna.
Landsþekktur í „Løvens Hule“
Lehrmann varð fyrst þekktur fyrir að stofna bílasöluna Bilbasen og útgáfufyrirtækið Benjamin Media, en almenningur kynntist honum aðallega sem einn af fjárfestunum í vinsælu sjónvarpsþáttunum „Løvens Hule“ á DR á árunum 2019 til 2022.
Á þeim tíma fjárfesti hann meðal annars í fasteignaveitunni Estaldo, hundafóðursframleiðandanum Vuffeli, garðsláttarfyrirtækinu DM Greenkeeping og málningarframleiðandanum Decofarver.
Árið 2022 ákvað hann að hætta í þáttunum og einbeita sér að færri en stærri fjárfestingum. Síðan þá hefur hann meðal annars losað sig við hlut í Repeatly bílaleiguþjónustu, Decofarver og kjötvefversluninni Mr. Beef.
