Það glaðnaði yfir markaðnum með sumarhús hér á landi í fyrra og fjölgaði kaupsamningum um 25% frá fyrra ári. Til samanburðar fækkaði kaupsamningum um sumarhús á árunum 2022-2023. Þetta kemur fram í hagsjá Landsbankans.
Bent er á að kaupsamningum, samkvæmt kaupskrá HMS, fjölgaði þó nokkuð á uppgangstíma ferðaþjónustunnar á árunum 2016-2017 en fækkaði svo árið 2018 og sérstaklega árið 2019 þegar hægði á í efnahagslífinu.
„Faraldurinn blés nýju lífi í sumarhúsakaup og kaupsamningum fjölgaði um 84% á milli áranna 2019 og 2020,“ segir í hagsjánni en hagfræðideildin telur líklegt að auk breytts neyslumynsturs hafi opinber stuðningur við framkvæmdir og viðhald hlýtur að hafa spilað inn í.
Fjölgað um 45% á tuttugu árum
Sumarhús á Íslandi voru rúmlega 15 þúsund í lok ársins 2024, eða rúmlega 45% fleiri en árið en 2005. Sumarhúsum fjölgaði um rúm 31% á milli áranna 2005 og 2015, en um rúm 10% á árunum 2015-2024.
Rúmlega helmingur sumarhúsa á landinu var á Suðurlandi í árslok 2024 og rétt tæplega fjórðungur á Vesturlandi.
„Á síðustu 20 árum hefur sumarhúsum þó fjölgað hlutfallslega mest á Norðurlandi, um 57,3%. Frá árinu 2005 hefur sumarhúsum á Suðurlandi fjölgað um 56,6% og um 30,8% á Vesturlandi.“
Meðalfermetraverð 562 þúsund krónur
Samhliða stóraukinni eftirspurn í Covid hækkaði verð á sumarhúsum um allt að 24% á milli ára. Hagfræðideild Landsbankans segir að hægt hafi á verðhækkunum á síðustu tveimur árum.
Meðalfermetraverð seldra sumarhúsa var um 562 þúsund á síðasta ári og hækkaði um 2,9% á milli ára á sama tíma og kaupsamningum fjölgaði um rúmlega 25%.
„Hér má þó hafa í huga að sumarhús geta verið mjög fjölbreytt að stærð og gerð og því ber að taka meðaltölum með fyrirvara.“
