Logi Már Einarsson menningar-, nýsköpunar- og háskólaráðherra lagði fram á ríkisstjórnarfundi í morgun minnisblað um stuðning til einkarekinna fjölmiðla.
Þetta kemur fram á vef stjórnarráðsins en hann upplýsti þar með ríkisstjórnina um áform sín um að leggja fram frumvarp um áframhaldandi stuðning til einkarekinna fjölmiðla.
Í fréttatilkynningunni segir að markmiðið með styrknum sé að viðhalda fyrirsjáanleika í rekstri einkarekinna fjölmiðla og tryggja að þeir geti sinnt lýðræðishlutverki sínu.
Frumvarp Loga mun taka óbreytt upp þau ákvæði sem féllu úr gildi um áramótin og er ráðgert að gildistími frumvarpsins verði eitt ár og er það að fullu fjármagnað í fjárlögum þessa árs.
Í fyrra fengu einkareknir fjölmiðlar meira en hálfan milljarð frá skattgreiðendum í rekstrarstuðning en á sama tíma fékk RÚV um 6 milljarða í fyrra.
„Vinna er hafin við endurskoðun á kerfinu og tekur hún meðal annars tillit til þeirra athugasemda sem gerðar hafa verið og af vinnu við fjölmiðlastefnu og einstakra þátta hennar en stefnt er að því að leggja fram þingsályktunartillögu á vorþingi sem mælir fyrir um fjölmiðlastefnu. Vinna við endurskoðun á stuðningskerfi einkarekinna fjölmiðla tekur mið af því að frumvarp þess efnis verði á þingmálaskrá næsta vetrar,“ segir á vef stjórnarráðsins.
