Lögreglan í New York telur sig vita hvar morðingi Brian Thompson, forstjóra United Health, gisti áður en hann framkvæmdi verknaðinn og réðst lögreglan í húsleit í vesturhluta Manhattan-eyju á miðvikudagskvöldið.
Samkvæmt The Wall Street Journal er um að ræða Hostel í borginni.
Líkt og greint var frá í gær telur lögreglan að morðið á Thompson hafi verið þaulskipulagt og stendur mikil leit yfir í borginni að hinum grunaða.
Eric Adams, borgarstjóri New York borgar, sagði í gærmorgun að rannsókn lögreglu miði vel áfram og að hann sé sannfærður um að lögreglan muni hafa uppi á manninum.
Adams, sem var lögreglumaður í New York til lengri tíma, segir það sláandi að sjá að morðinginn notaði hljóðdeyfi.
„Á öllum mínum starfsferli hjá lögreglunni hef ég aldrei séð hljóðdeyfi áður. Það er eitthvað sem er sláandi fyrir okkur öll,“ sagði Adams í gær.
Í gærmorgun voru birtar ljósmyndir sem sýna andlit manns sem lögreglan vill ná tali af í tengslum við skotárásina. Sá hinn sami virðist vera skælbrosandi að halla sér yfir afgreiðsluborð.
Lögreglan hefur boðið fram 10 þúsund dali, um 1,4 milljónir króna, fyrir upplýsingar um ódæðismanninn.
The Wall Street Journal lýsti atburðarás miðvikudagsins í frétt í gær.
Árlegur fjárfestadagur United Health Group var haldinn á miðvikudagsmorgun. Boðið var upp á morgunmat og um klukkan átta hóf hópur fjárfesta, stjórnenda og greiningaraðila frá Wall Street að safnast saman í sal á þriðju hæð Hilton-hótelsins í Midtown Manhattan til að hlýða á kynningar um framtíð fyrirtækisins, sem er stærsta sjúkratryggingafyrirtæki Bandaríkjanna.
Þá vissu viðstaddir ekki að einn af helstu stjórnendum fyrirtækisins hafði verið myrtur fyrr um morguninn fyrir utan hótelið í árás sem lögreglan segir hafa verið þaulskipulagða.
Brian Thompson forstjóri United Healthcare var skammt frá aðalinngangi Hilton hótelsins klukkan 6:44 á miðvikudagsmorgun þegar árásarmaðurinn, klæddur í dökka hettupeysu og með gráa bakpoka, fylgdi Thompson rólega eftir í nokkur skref áður en hann skaut hann með 9 mm skammbyssu. Árásarmaðurinn flúði í gegnum sund og hvarf á reiðhjóli, að sögn lögreglu.
Það var ekki fyrr en um klukkan níu leytið sem Andrew Witty, forstjóri UnitedHealth Group, móðurfyrirtækis UnitedHealthcare, aflýsti fundinum „vegna mjög alvarlegs ástands hjá einum úr okkar teymi. Ég er viss um að þið skiljið það.“
Upplýsingar um skotárásina höfðu þá þegar farið um salinn eins og eldur í sinu. Thompson var úrskurðaður látinn klukkan 7:12.
