Luvsannamsrain Oyun-Erdene, forsætisráðherra Mongólíu, hefur sagt af sér eftir að hafa tapað vantrauststillögu á þingi landsins í kjölfar vaxandi óánægju meðal almennings vegna hegðunar sonar hans á samfélagsmiðlum.
Oyun-Erdene, sem hefur verið við völd síðan 2021, hlaut aðeins 44 atkvæði af þeim 64 sem hann þurfti til að halda völdum í atkvæðagreiðslu sem fór fram aðfaranótt þriðjudags.
Hann hafði sjálfur kallað eftir vantrauststillögunni í síðustu viku í ljósi vaxandi spennu innan eigin flokks og mótmæla vegna umdeildra ljósmynda sem sonur hans setti á samfélagsmiðla.
Sonur Oyun-Erdene, hinn 23 ára gamli Temuulen, er duglegur að sýna frá lúxuslífstíl sínum á samfélagsmiðlum.
Temuulen sést reglulega í rándýrum hönnunarfatnaði og keyrandi um á Mercedes Benz-bifreið. Þar sem Temuulen er atvinnulaus hafa myndirnar vakið mikla umræðu um misnotkun á opinberum fjármunum en faðir hans er sagður fjármagna lífstílinn.
Mongólski alþýðuflokkurinn, sem leitt hefur ríkisstjórn í samstarfi við tvö önnur stjórnmálaöfl frá þingkosningum í fyrra, hyggst nú reyna að mynda nýja ríkisstjórn samkvæmt Financial Times.
Óvissa á viðkvæmum tíma
Mongólía, sem hefur um árabil reynt að nýta auðlindir sínar til að laða að erlenda fjárfestingu stendur nú frammi fyrir pólitískri óvissu.
Landið, sem losnaði undan einræði sósíalismans á tíunda áratugnum, hefur á síðustu árum gert tilraunir til að efla lýðræði og efnahagslega sjálfstæði, meðal annars með fjárfestingum í námuiðnaði.
Oyun-Erdene lagði áherslu á að draga úr fátækt, með markmiðum um að minnka hlutfall fátækra íbúa niður í 15% fyrir lok áratugarins.
Hann hafði einnig lagt mikla áherslu á samstarf við vestræna aðila á borð við Rio Tinto og Orano Group, og undirritaði meðal annars samning um 1,6 milljarða dala fjárfestingu í úraníumvinnslu með franska fyrirtækinu.
Í ræðu á þinginu áður en atkvæðagreiðslan fór fram reyndi Oyun-Erdene að verja verk sín og árangur ríkisstjórnarinnar, meðal annars í lækkun skulda, orkumálum og stórauknum útflutningstekjum. Hann viðurkenndi þó að hafa sinnt of lítið „innanlandsmálum og félagslegum þáttum.“
Hávær mótmæli brutust út í landinu árið 2022 vegna spillingar í kolavinnslum landsins eru einnig talin hafa grafið undan trúverðugleika hans. Nú bætist við reiði almennings vegna lífsstíls sonar hans, sem hefur dvalið við dýrindis aðstæður erlendis.
Hagvöxtur og betra lánshæfi
Fitch Ratings hafði í september hækkað lánshæfismat Mongólíu í ljósi aukins hagvaxtar og umbóta og spáð um 6% hagvexti að meðaltali næstu ár. Nú gæti pólitísk óvissa sett strik í reikninginn.
„Mörg stór innviðaverkefni eru þegar komin af stað en næsta ríkisstjórn mun standa frammi fyrir miklum áskorunum,“ sagði Bayanjargal Byambasaikhan, varaformaður Viðskiptaráðs Mongólíu, í samtali við Financial Times. Hann benti á verðbólgu, samdrátt í útflutningstekjum og áskoranir í stjórn samsteypustjórna.
Forsætisráðuneyti Mongólíu hefur ekki tjáð sig opinberlega um niðurstöðu atkvæðagreiðslunnar.
Næstu dagar munu skera úr um hver tekur við keflinu í landinu sem á sér mikla þýðingu fyrir heiminn vegna náttúruauðlinda sinna.
