Hluta­bréfa­verð líftækni­lyfja­fyrir­tækisins Ocu­lis, sem sér­hæfir sig í augn­sjúk­dómum, lækkaði um rúm 3% í við­skiptum dagsins en gengi félagsins hefur nú lækkað um rúm 20% síðastliðinn mánuð.

Á þeim tíma hefur gengið lækkað úr 3.140 krónum í 2.500 krónur og markaðsvirði félagsins lækkað um 34,6 milljarða.

Markaðsvirði Ocu­lis við lokun markaða í dag var tæp­lega 134,9 milljarðar.

Svo virðist sem vaxtarfélögin séu að finna fyrir vaxandi efna­hags­óvissu á heims­vísu en hluta­bréfa­verð Al­vot­ech hefur einnig lækkað tölu­vert síðastliðinn mánuð.

Gengi Al­vot­ech lækkaði um 2% í við­skiptum dagsins og lokaði í 1.490 krónum sem er um 17% lægra en fyrir mánuði síðan.

Ís­lenska málm­leitarfélagið Amaroq hefur síðan lækkað um rúm 19% síðastliðinn mánuð eftir um tæp­lega 1% lækkun í við­skipum dagsins. Gengi félagsins stendur í 162,5 krónum eftir um 355 milljón króna veltu í dag.

Gengi Play og Icelandair lækkaði einnig í við­skiptum dagsins er hluta­bréfa­verð beggja flug­félaga fór niður um 2%.

Dagsloka­gengi Icelandair var 1,19 krónur á hlut á meðan dagsloka­gengi Play var 0,72 krónur.

Úr­vals­vísi­talan OMXI15 lækkaði um 0,88% og lokaði í 2.792,89 stigum. Heildar­velta á markaði 2,8 milljarðar.