Ráðgjafarfyrirtækið McKinsey hefur náð samkomulagi við dómsmálaráðuneyti Bandaríkjanna um að greiða 650 milljóna dala stjórnvaldssekt, rúmlega 90 milljarða íslenskra króna, fyrir aðkomu sína að ópíóðafaraldrinum í Bandaríkjunum.
Samkvæmt The Wall Street Journalveitti McKinsey fjölmörgum lyfjafyrirtækjum sem framleiddu og seldu ópíóðalyf ráðgjöf um hvernig væri hægt að auka sölutölur.
Í dómsátt McKinsey og dómsmálaráðuneytisins segir að ráðuneytið muni í kjölfarið falla frá saksókn gegn ráðgjafarfyrirtækinu og telst rannsókn á aðkomu þeirra að faraldrinum lokið.
McKinsey hefur nú þegar greitt hátt í einn milljarð Bandaríkjadala í tengslum við einkamál gegn fyrirtækinu vegna aðkomu þeirra að faraldrinum.
Rannsókn dómsmálaráðuneytisins á McKinsey hefur staðið yfir í mörg ár en meðal viðskiptavina ráðgjafarfyrirtækisins voru Purdue Pharma, Endo International og Mallinckrodt.
The Wall Street Journal greindi frá því í apríl að tvö saksóknaraembætti, eitt í Virgíníu-ríki og annað í Massachusetts, væru einnig að rannsaka fyrirtækið.
McKinsey greiddi 642 milljónir dala í sekt árið 2021 vegna ráðgjafastarfa sinna til lyfjafyrirtækjanna en neitaði jafnframt að hafa farið á svig við lög. Árið 2023 greiddi fyrirtækið 327 milljóna dala sekt til frumbyggja í Bandaríkjunum
