Atvinnuleysi á Íslandi mældist 3,7 prósent í maí 2025 og lækkaði úr 3,9 prósentum frá apríl, samkvæmt mánaðarskýrslu Vinnumálastofnunar.
Á sama tíma mældist atvinnuleysið 3,4 prósent í maí í fyrra.
Erlendir ríkisborgarar voru 56 prósent þeirra sem voru skráðir atvinnulausir í lok mánaðarins.
Alls voru 7.885 einstaklingar skráðir atvinnulausir í lok maí, þar af 4.423 með erlent ríkisfang. Erlendir ríkisborgarar voru 56 prósent þeirra sem voru skráðir atvinnulausir í lok mánaðarins.
Flestir þeirra komu frá Póllandi, eða 1.799 einstaklingar, sem jafngildir um 41 prósenti allra erlendra atvinnuleitenda. Einnig voru fjölmennir hópar frá Litáen, Rúmeníu og Úkraínu.
Langtímaatvinnuleysi vex
Að meðaltali voru 7.697 atvinnulausir í maí, sem er fækkun um 405 frá apríl.
Bæði körlum og konum fækkaði í atvinnuleit og atvinnuleysi minnkaði í öllum landshlutum. Mest var atvinnuleysi á Suðurnesjum, 6,1 prósent, en minnst á Norðurlandi vestra, 1,2 prósent.
Alls höfðu 1.506 atvinnuleitendur verið án atvinnu í meira en 12 mánuði í lok maí.
Í maí 2024 var fjöldi þeirra hins vegar 1.255 og nemur fjölgunin 251 á milli ára. Þeir sem höfðu verið atvinnulausir í 6-12 mánuði voru hins vegar 1.996 í maí síðastliðnum en voru 1.929 í maí 2024.
Atvinnulausum fækkaði í öllum atvinnugreinum í maí nema í fjármála- og vátryggingastarfsemi þar sem fjölgaði um tvo.
Mest var fækkunin í ferðaþjónustu þar sem fækkaði um 91, í byggingariðnaði þar sem fækkaði um 64 en einnig í gistiþjónustu um 61.
Atvinnulausum fækkaði í öllum atvinnugreinum í maí nema í fjármála- og vátryggingastarfsemi þar sem fjölgaði um tvo.
Mest var fækkunin í ferðaþjónustu þar sem fækkaði um 91, í byggingariðnaði þar sem fækkaði um 64 en einnig í gistiþjónustu um 61.
Atvinnuleitendur á Íslandi hafa þann möguleika að geta farið í atvinnuleit innan annars EES-ríkis í allt að þrjá mánuði og haldið atvinnuleysisbótum sínum, fái þeir útgefið svokallað U2-vottorð sem Vinnumálastofnun hefur umsýslu með.
Í maí voru gefin út 131 vottorð til einstaklinga sem fóru í atvinnuleit til Evrópu. Flestir fóru í atvinnuleit til Póllands eða 85 einstaklingar, 13 fóru til Litáen, átta fóru til Spánar og fimm til Lettlands. Þá voru gefin út 20 vottorð til viðbótar til níu annarra ríkja.
