Greiningarfyrirtækið Jakobsson Capital metur virði hlutabréfa Skaga á 23,4 krónur á hlut í nýju verðmati sem kom út í byrjun vikunnar. Það er um 22% hærra en núverandi markaðsgengi Skaga sem stóð í 19,2 krónum á hlut við lokun Kauphallarinnar í dag.

Verðmatsgengi Jakobsson Capital á Skaga lækkar úr 24,8 krónum í 23,4 krónur frá fyrra verðmati greiningarfyrirtækisins.

Hvað lítillega lækkun á verðmatsgengi Skaga varðar segir greiningarfyrirtækið að ólíklegt sé að tryggingarfélögin skili 4% raunávöxtun í ár. Sömuleiðis hafi langtímavextir hækkað umtalsvert frá byrjun árs og krafa til eiginfjár hækkað nokkuð.

Grunnreksturinn að styrkjast

Í greiningunni, sem er gefin út í kjölfar þess að Skagi birti uppgjör fyrir annan ársfjórðung, segir að þótt tap hafi verið á rekstri Skaga á fyrri árshelmingi og neikvæður viðsnúningur frá árinu á undan þá sé allt að þróast í rétta átt hjá samstæðunni sem inniheldur VÍS, Fossa fjárfestingarbanka og Íslensk verðbréf.