Bandarísk fyrirtæki hafa á fyrstu mánuðum ársins sótt í síauknum mæli á evrópskan skuldabréfamarkað og náð metútgáfu svonefndra „öfuga-kana“ skuldabréfa (e. Reverse Yankee bonds).
Samkvæmt Financial Times endurspeglar þessi þróun ekki aðeins muninn á vaxtastigi beggja megin Atlantshafsins, heldur einnig vaxandi þörf fyrirtækja fyrir fjölbreyttari fjármögnun og gjaldmiðlalega áhættudreifingu.
Að sögn Bank of America hafa bandarísk fyrirtæki þegar gefið út skuldabréf í evrum fyrir samtals meira en 40 milljarða evra frá áramótum, sem er meira en útgáfa þeirra á sama tíma í fyrra og stefnir í að slá út fyrra met frá árinu 2019.
Hugtakið Reverse Yankee vísar til skuldabréfaútgáfu bandarískra fyrirtækja í evrum á evrópskum markaði, í andstöðu við hefðbundin Yankee bonds sem eru skuldabréf erlendra aðila í Bandaríkjadölum gefin út í Bandaríkjunum.
Þetta útgáfuform hefur rutt sér til rúms á ný í ljósi þess að fjármögnunarkostnaður í Evrópu er verulega lægri en í Bandaríkjunum.
Vaxtamunur á ríkisskuldabréfum Þýskalands og Bandaríkjanna náði í desember yfir tvö prósentustig, og sú þróun hefur endurspeglast í skuldabréfavöxtum fyrirtækja.
Þannig greiða bandarísk fjárfestingafyrirtæki í dag að meðaltali um tveimur prósentustigum hærri vexti við fjármögnun í Bandaríkjunum en á evrumarkaði.
Risafyrirtæki með stórar útgáfur
Þannig gaf Alphabet, móðurfélag Google, nýverið út skuldabréf í evrum fyrir 6,75 milljarða, og Pfizer fylgdi í kjölfarið með útgáfu fyrir 3,3 milljarða evra. T-Mobile US safnaði 2,75 milljörðum evra.
Slíkar umfangsmiklar útgáfur sýna ekki aðeins að markaðurinn býður hagstæð kjör, heldur einnig að bandarísk fyrirtæki hafa burði til að sækja sér fjármögnun í mörgum gjaldmiðlum og á mörgum svæðum samtímis.
Ýmsir þættir liggja að baki þessari þróun samkvæmt FT.
Meðal þeirra er pólitísk óvissa innan Bandaríkjanna, meðal annars vegna umdeildra tollaaðgerða Donalds Trump, sem valdið hafa sveiflum í gjaldmiðlum og á fjármálamörkuðum.
Fyrirtæki sem hafa tekjur og eignir í Evrópu kjósa því í auknum mæli að fjármagna sig í evrum og skapa með því náttúrulega gjaldmiðlajöfnun gegn sveiflum í gengi.
Þótt gengisvernd geti dregið úr hluta ávinningsins fyrir þau fyrirtæki sem flytja fjármagnið aftur til Bandaríkjanna er fjárhagslegur ábati fyrir mörg félög enn umtalsverður.
Að mati sérfræðinga er þessi þróun einnig til marks um styrkleika þessara fyrirtækja. Með því að sækja sér fjármögnun í Evrópu í stórum stíl sýna þau fjárfestum að þau hafi aðgang að fjölbreyttum fjármálamörkuðum og þurfi ekki að reiða sig á bandaríska lánamarkaði einvörðungu.
Slíkt styrkir einnig stöðu þeirra gagnvart öðrum lánveitendum og dregur úr skammtímahættu í fjármálum.
Að teknu tilliti til umfangs og hraða skuldabréfaútgáfunnar má ætla að þessi þróun haldi áfram næstu misseri, að minnsta kosti meðan vaxtamunurinn stendur.
Damien Hill hjá Insight Investment bendir á að lægri heildarfjármögnunarkostnaður í evrum hvetji áfram útgefendur til að nýta tækifærið meðan það varir.
Að sama skapi má búast við því að evrópskir skuldabréfamarkaðir verði næmari fyrir pólitískum ákvörðunum og efnahagsstefnu í Bandaríkjunum, þar sem áhrif stærstu útgefenda vega þyngra en áður.
Því virðist sem bandarísk stórfyrirtæki hafi fundið sér hagstæðan farveg í evrópskum skuldabréfamörkuðum, bæði til skemmri tíma í krafti vaxta, og til lengri tíma sem liður í áhættudreifingu og fjármálalegri sveigjanleika.
Þetta staðfestir þá reglu sem sífellt fleiri alþjóðleg fyrirtæki vinna eftir: að vera ekki háð einni mynt, einum markaði eða einu fjármálakerfi.
