Eftir tæplega 20% hækkun í síðustu viku í kjölfar uppgjörs annars ársfjórðungs hefur gengi Alvotech lækkað um tæp 8% síðustu tvo viðskiptadaga.
Líftæknilyfjafélagið skilaði jákvæðri EBITDA-framlegð í fyrsta sinn á fjórðungnum. Heildartekjur námu 236 milljónum dollara, eða um 32,8 milljörðum króna, sem er meira en tíföldun frá sama tímabili í fyrra.
Aðlöguð EBITDA-framlegð Alvotech nam 64 milljónum dollara, eða um 8,9 milljörðum króna, á fyrri árshelmingi.
Í gær var greint frá því að breska sjóðastýringarfélagið Redwheel hafi keypt í Alvotech fyrir um tvo milljarða í utanþingsviðskiptum á genginu 1670 krónur.
Gengið rauk upp í 1780 krónur síðastliðinn föstudag en tók að lækka á ný á þriðjudaginn.
Hlutabréfaverð Alvotech lækkaði um tæp 5% í viðskiptum dagsins og var dagslokagengið 1640 krónur.
Reitir lækka í aðdraganda uppgjörs
Hlutabréfaverð fasteignafélagsins Reita lækkaði um rúm 2% í viðskiptum dagsins en félagið birtir árshlutauppgjör eftir lokun markaða í dag. Gengi Kviku banka og Amaroq féll einnig um 2% í viðskiptum dagsins.
Hlutabréfaverð Haga leiddi hækkanir á markaði er gengi félagsins fór upp um rúm 2% í tæplega 300 milljóna króna viðskiptum.
Úrvalsvísitalan OMXI15 lækkaði um 0,59% og var heildarvelta á markaði 3,7 milljarðar.
