Samtök iðnaðarins (SI) telja ljóst að áform innviðaráðherra um skattlagningu orkumannvirkja muni leiða af sér milljarða aukakostnaði orkufyrirtækja sem verði velt út í raforkuverð til almennings og fyrirtækja án þess að fullvissa sé fyrir aukinni orkuöflun.
Þetta kemur fram í umsögn SI við áformunum. Þar lýsa samtökin þungum áhyggjum af áhrifum boðaðrar útfærslu á samkeppnishæfni stóriðju á Íslandi.
Eyjólfur Ármannsson innviðaráðherra kynnti um miðjan maí áform um afnám á undanþágu rafveitna (vatnsafls- og jarðvarmavirkjanna og vindmylla) frá fasteignamati. Undanþágan hefur leitt til þess að stærstur hluti mannvirkja til orkuframleiðslu er undanþeginn fasteignaskatti.
Samtök iðnaðarins segja að slíkar breytingar gætu aukið útgjöld orkufyrirtækja verulega og verið velt yfir á almenning og atvinnulíf í formi hærra raforkuverðs.
Samtökin hvetja stjórnvöld til að skoða aðrar leiðir til að tryggja nærsamfélagi orkumannvirkja sanngjarnari hlutdeild í ávinningi af raforkuframleiðslu, svo sem með breyttri skiptingu tekna á milli ríkis og sveitarfélaga.
Vísað er í nýútgefna greiningu Raforkueftirlitsins en samkvæmt henni hefur raforkukostnaður heimila hækkað um tæp 11% á föstu verðlagi á tímabilinu 2020–2025 og fyrirtæki sem nota mikið rafmagn hafa séð kostnað hækka um 24% sem jafngildir 5% árlegri hækkun.
„Samtök iðnaðarins vara við því að þessi kostnaðarauki muni bitna sérstaklega á orkusæknum iðnaði, sem er burðarás í íslenskum útflutningi og verðmætasköpun. Ísland keppi á alþjóðlegum mörkuðum þar sem orkuverð sé lykilþáttur í samkeppnishæfni. Án þess að samhliða komi aukin orkuöflun, megi búast við áframhaldandi hækkunum sem geti grafið undan atvinnuuppbyggingu og fjárfestingu,“ segir í tilkynningu á vef SI.
