ST eignarhaldsfélag ehf., sem er hluti af samstæðu Mókolls ehf. sem inniheldur m.a. Eykt, og Steypustöðina, hefur gert samkomulag um kaup á öllu hlutafé í Krafti ehf., söluaðila MAN, Palfinger og BucherMunicipal á Íslandi.
Samningurinn var undirritaður af Birni Erlingssyni, eiganda Krafts, en kaupin eru háð samþykki Samkeppniseftirlitsins, að því er kemur fram í tilkynningu.
Þess má geta að Styrkás náði samkomulagi um kaup á Krafti í fyrra en ákveðið var í janúar síðastliðnum að falla frá viðskiptunum í kjölfar þess að Samkeppniseftirlitið tilkynnti um að gögn bentu til neikvæðra áhrifa á samkeppni á mögulegum mörkuðum málsins.
Verður áfram sjálfstæð eining
Fram kemur að nýir eigendur Krafts hyggist halda rekstri Krafts áfram sem sjálfstæðri einingu innan samstæðu Mókolls. Stefnt sé að því að styrkja stöðu félagsins enn frekar með því að efla þjónustu og horfa til nýrra markaða.
„Við lítum á kaupin á Krafti sem einstakt tækifæri,“ segir Pétur Guðmundsson, eigandi Mókolls ehf., í tilkynningunni. „Félagið hefur byggt upp öfluga markaðsstöðu og við sjáum marga möguleika til frekari vaxtar.“
Kraftur velti 2,4 milljörðum króna og skilaði hagnaði fyrir afskriftir (EBITDA) upp á 182 milljónir króna í fyrra.
„Kraftur hóf starfsemi árið 1966 og hef ég starfað hjá félaginu í yfir fjörutíu ár og gengt starfi framkvæmdastjóra félagsins frá árinu 1996. Umsvif okkar hafa aukist jafnt og þétt í gegnum tíðina og vörumerkjum fjölgað,“ segir Björn Erlingsson, aðaleigandi Krafts.
„Á þessum tímamótum er ánægjulegt að afhenda keflið til nýs sterks eiganda sem hefur mikla burði til að halda áfram að þjónusta viðskiptavini okkar. Framtíðin er björt enda hefur félagið á að skipa úrvals hópi starfsfólks og býr að traustum viðskiptasamböndum til áratuga.“
Arion banki, BBA/Fjeldco og Deloitte veittu kaupanda ráðgjöf við viðskiptin, en KPMG var ráðgjafi seljanda.
