Matsfyrirtækið Moody´s hefur hækkað lánshæfismat Landsvirkjunar úr Baa1 í A3. Samhliða hefur Moody´s breytt horfum á lánshæfi Landsvirkjunar úr jákvæðum í stöðugar horfur.
Hækkunin kemur í kjölfar hækkunar á lánshæfismati íslenska ríkisins sem var hækkað úr A2 í A1 síðastliðinn föstudag en lánshæfismat Landsvirkjunar byggist að hluta til á lánshæfismati íslenska ríkisins vegna eignarhalds þess og mikilvægis Landsvirkjunar fyrir íslenskt efnahagslíf.
Matsfyrirtækið Moody´s hefur hækkað lánshæfismat Landsvirkjunar úr Baa1 í A3. Samhliða hefur Moody´s breytt horfum á lánshæfi Landsvirkjunar úr jákvæðum í stöðugar horfur.
Hækkunin kemur í kjölfar hækkunar á lánshæfismati íslenska ríkisins sem var hækkað úr A2 í A1 síðastliðinn föstudag en lánshæfismat Landsvirkjunar byggist að hluta til á lánshæfismati íslenska ríkisins vegna eignarhalds þess og mikilvægis Landsvirkjunar fyrir íslenskt efnahagslíf.
„Mikilvægi Landsvirkjunar fyrir íslenskt efnahagslíf skýrist af því að Landsvirkjun vinnur um 70% af allri raforku á Íslandi og meðal stærstu viðskiptavina fyrirtækisins eru alþjóðleg orkusækin fyrirtæki sem skila um þriðjungi af útflutningi Íslands,“ segir í tilkynningu frá Landsvirkjun.
Að mati Moodys endurspeglar lánshæfismatið sterka stöðu Landsvirkjunar á íslenskum orkumarkaði og góða fjárhagsstöðu nú þegar fyrirtækið stefnir á framkvæmdir við nýja virkjunarkosti.
Moodys breytti horfum á lánshæfi Landvirkjunar síðast í júlí á þessu ári úr stöðugum í jákvæðar samhliða því að matfyrirtækið færði grunneinkunn Landsvirkjunar (e. The Baseline Credit Assessment, BCA) úr baa1 í baa3.
Í júlí sagði Moodys að lánshæfiseinkunn Landsvirkjunar gæti hækkað ef lánshæfiseinkunn ríkissjóðs hækkaði og ef sjóðstreymis- og skuldakennitölur Landsvirkjunar héldu áfram að vera sterkar.
Í lok árs í fyrra hækkaði S&P Global Ratings lánshæfismat Landsvirkjunar um einn flokk, í A- úr BBB+, með stöðugum horfum.
Landsvirkjun hagnaðist um 209,5 milljónir dala, eða sem nemur nærri 29 milljörðum króna, á árinu 2023, sem er um 30% aukning frá fyrra ári.
Stjórn fyrirtækisins lagði til að arður til ríkisins yrði upp á 20 milljarða króna líkt og í fyrra. Aðalfundur Landsvirkjunar í apríl samþykkti síðan tillögu stjórnar um að hækka arðgreiðsluna í 30 milljarða.
Eignir Landsvirkjunar voru bókfærðar á 3.614 milljónir dala eða um 492 milljarða króna í árslok 2023.
