Elon Musk hefur ákveðið að beina athygli sinni aftur að Tesla eftir að afkoma fyrirtækisins dróst verulega saman á fyrsta ársfjórðungi.
Ákvörðunin kemur í kjölfar gagnrýni á pólitíska aðkomu hans og vaxandi ímyndarkreppu hjá rafbílaframleiðandanum.
Hagnaður Tesla dróst saman um 71% milli ára og nam 409 milljónum dala. Sala dróst einnig saman um 13% miðað við sama tíma í fyrra, og missti Tesla í kjölfarið stöðu sína sem stærsti rafbílaframleiðandi heims til kínverska keppinautarins BYD.
Afkoman á fyrsta ársfjórðungi langt undir spám markaðsaðila og sú versta í fyrra ár.
„Frá og með næsta mánuði mun ég verja mun meiri tíma mínum í Tesla,“ sagði Musk á fjárfestafundi í gær en Financial Times greinir frá.
Þrátt fyrir þessa breytingu hyggst hann ekki segja sig frá starfi formlega og telur líklegt að hann gegni áfram leiðtogahlutverki innan DOGE út kjörtímabil Donalds Trump forseta.
„Ég vil tryggja að viðhalda þeim árangri sem náðst hefur í að uppræta sóun og svik í opinberri stjórnsýslu,“ sagði hann.
Markaðurinn bregst við
Fréttirnar vöktu jákvæð viðbrögð meðal fjárfesta og hækkuðu hlutabréf Tesla um allt að 7,8% í viðskiptum eftir lokun markaða. Aðeins hefur dregið úr hækkuninni og má áætla að bréf Tesla opni um 5% hærri á eftir.
Tengsl Musks við Trump Bandaríkjaforseta hafa reynst rafbílaframleiðandanum erfið en mótmæli hafa brotist út við sölustaði fyrirtækisins og vörumerkið hefur í auknum mæli verið tengt við stefnu forsetans.
Viðskiptaaðgerðir ríkisstjórnarinnar, einkum hár tollur á kínverskar vörur, hafa einnig sett strik í reikninginn hjá Tesla.
Þrátt fyrir að framleiðsla bifreiða fari að mestu fram í Bandaríkjunum er fyrirtækið háð innflutningi á íhlutum, meðal annars rafhlöðum frá Kína.
Vaibhav Taneja, fjármálastjóri Tesla, varaði við því að þessir tollar gætu haft „ósanngjörn“ áhrif á orkugeymslueiningar fyrirtækisins.
DOGE dregið niður á jörðina
Musk hafði í upphafi fullyrt að DOGE myndi skera niður allt að 2.000 milljarða dala úr útgjöldum bandaríska ríkisins. Nú segir hann sparnaðinn nema um 150 milljörðum, og gefur í skyn að megnið af vinnunni sé þegar að baki.
Sýnileiki Musks innan ríkisstjórnarinnar hefur minnkað undanfarna mánuði og hann hefur staðið í deilum við áhrifamenn þar innanborðs, einkum vegna viðskiptastefnunnar.
Nýverið kallaði hann Peter Navarro, helsta hugmyndafræðing tollastefnu ríkisstjórnarinnar, „fávita“ og ítrekaði að lægri tollar væru „forsenda velmegunar“.
Hann bætti þó við að ákvörðunartakan væri á valdi forseta, sem kjörinn væri af þjóðinni.
