Myndir: Útboðsþing Samtaka iðnaðarins

Á Útboðsþingi Samtaka iðnaðarins í síðustu viku, sem fór fram í Háteig á Grand Hótel Reykjavík, kynntu fulltrúar tíu opinberra aðila verklegar framkvæmdir fyrir samtals 128 milljarða króna á árinu. Það er hækkun um 49 milljarða frá fyrra ári.

Vegagerðin var með hæstu upphæðina í fyrirhugaðar framkvæmdir eða 21,9 milljarða, þar næst Isavia fyrir 20,5 milljarða, og loks Reykjavíkurborg með 20 milljarða. Síðan kom Framkvæmdasýsla ríkisins með 19,7 milljarða, þar næst Samtök sveitarfélaga á höfuðborgarsvæðinu fyrir 16,4 milljarða, Landsnet fyrir 9,2 milljarða og loks Veitur fyrir 8,7 milljarða. Þar á eftir komu svo Landsvirkjun og Orka náttúrunnar, hvort um sig með 4,4 milljarða og loks Faxaflóahafnir með 2,7 milljarða.

Sigurður Hannesson, framkvæmdastjóri Samtaka iðnaðarins, var kankvís á svip þegar hann opnaði útboðsþing samtakanna.

Sigurður R. Ragnarsson, forstjóri Íslenskra aðalverktaka, virtist þó ekki alveg jafnánægður þrátt fyrir 49 milljarða aukningu í væntum útboðum verkkaupa á árinu.

Bergþóra Þorkellsdóttir vegamálastjóri, eða eins og embættið heitir í dag forstjóri Vegagerðarinnar, lét sig ekki vanta en stofnunin sér fram á að vera stærst í verkkaupum ársins, eða fyrir nærri 22 milljarða.

Andri Daði Aðalsteinsson er forstöðumaður sölu- og markaðssviðs Límtré Vírnets, sem ætti að fá eitthvað að gera við fyrirhuguð verkkaup ársins.

Marta Rós Karlsdóttir, forstöðumaður auðlinda og tækniþróunar hjá Orku náttúrunnar, mætti, en félagið er með útboð fyrir um 4,4 milljarða á árinu.

Guðjón Jónsson sér um öryggismál og stjórnun í framkvæmdastjórn VSÓ Ráðgjafar, en verkfræðifyrirtækið mun eflaust hafa eitthvað upp úr krafsinu í verkkaupum ársins.

Jón Þorvaldsson, aðstoðarforstjóri Faxaflóahafna, en opinbera fyrirtækið ber ábyrgð á útboðum fyrir 2,7 milljarða sem var lægsta fjárhæðin frá einni tiltekinni einingu á þinginu, sat með Maren Lind Másdóttur, deildarstjóra farangurskerfa ISAVIA.

Guðrún Ingvarsdóttir, forstjóri Framkvæmdasýslu ríkisins, fylgdist vel með, en útboð á vegum stofnunar hennar nema hátt í 20 milljarða á árinu.

Ingólfur Bender hagfræðingur Samtaka iðnaðarins.

Dagmar Þorsteinsdóttir framkvæmdastjóri HBH Byggir.

Dagur Bergþóruson Eggertsson er oddviti Samfylkingarinnar og borgarstjórinn í Reykjavík.

Björt Ólafsdóttir, fyrrverandi ráðherra og formaður Bjartrar framtíðar.