Nærri 14 milljarða velta fyrir loka­upp­færsluna

Velta á aðalmarkaði Kauphallarinnar nam 13,9 milljörðum króna í dag. Þar af var tæplega 11,2 milljarða viðskipti við lokun Kauphallarinnar.

Veltuna má einkum rekja til lokunaruppboðs en á mánudaginn tekur gildi aukin vigt fimmtán félaga á aðalmarkaðnum í vísitölum FTSE Russell vegna uppfærslu Íslands í flokk nýmarkaðsríkja (e. Secondary Emerging Markets).

Fyrir rúmu ári síðan var tilkynnt um að alþjóðlega vísitölufyrirtækið FTSE Russell hefði ákveðið að færa Ísland upp um flokk. Vigt íslenska markaðarins í vísitölunum var færð upp í þremur skrefum; hið fyrsta var þann 19. september sl., annað skrefið var 19. desember, og síðasta skrefið verður á mánudaginn næsta, 20. mars.

Í aðdraganda hvers skrefs fer fram umfangsmikil sala til erlendra vísitölusjóða. Við fyrsta skrefið í september var sem dæmi 14 milljarða velta í 337 viðskiptum sem áttu sér stað á aðeins hálfri mínútu í svokölluðu lokunaruppboði. Fyrir annað skrefið var tæplega 14 milljarða velta á lokamínútunum fyrir lokun markaðarins.

„Vísitölusjóðir vilja ekki bara eiga viðskipti á síðasta degi fyrir uppfærsluna, heldur vilja þeir helst eiga viðskipti í lokunaruppboðinu og tryggja sér þannig lokaverðið á markaðnum því það minnkar frávik frá vísitöluviðmiðinu,“ sagði Magnús Harðarson, forstjóri Kauphallarinnar, í viðtali við Viðskiptablaðið í kjölfar fyrstu uppfærslunnar.

Reitir og Ölgerðin hækka um meira en 5%

Úrvalsvísitalan hækkaði um 1,4% í dag. Reitir hækkuðu mest af félögum aðalmarkaðarins eða um 6,3% í nærri 700 milljóna veltu. Gengi Reita stendur nú í 84 krónum á hlut.

Ölgerðin, sem sendi frá sér jákvæða afkomuviðvörun eftir lokun Kauphallarinnar á miðvikudaginn, hækkaði um 5,5% í 350 milljóna viðskiptum. Gengi Ölgerðarinnar hækkaði um 9% í dag og í gær.

Mesta veltan var með hlutabréf Marels og Arion banka. Viðskipti með bréf Marels hljóðuðu upp á 3,1 milljarð króna en gengi félagsins hækkaði um 2,2% og stendur nú í 556 krónum. Hlutabréfaverð Arion banka hækkaði um 1,9% í 2,6 milljarða veltu.

Gengi Íslandsbanka lækkaði um 1,8% í 1,6 milljarða veltu og stendur nú í 120,6 krónum á hlut samanborið við 122,8 krónur við lokun markaða í gær. Lækkun bankans má rekja til þess að í dag er arðleysisdagur hjá bankanum sem ákvað að greiða út arð sem nemur 6,15 krónur á hlut vegna rekstrarársins 2022. Rétt er að benda á að einnig var arðleysisdagur hjá VÍS sem lækkaði um 2,8%.